Արտագա՞ղթ, թե՞ ժամանակավոր մեկնում. ՀՀ-ից ռեկորդային արտահոսքի և բնակչության կազմի աղճատման խնդիրը. ՏԵՍԱՆՅՈՒԹ

Հետպատերազմական 2021 թվականին սահմանային անցակետերով Հայաստանից մեկնողների և Հայաստան ժամանողների ցուցանիշները երկուսն էլ գերազանցել են 1 մլն 600 հազարը։ Բայց տարբերությունը եղել է գրեթե 44 հազար՝ ի վնաս Հայաստանի։ Այսինքն՝ գնացողները 44 հազարով ավելի շատ են եղել, քան եկողները։

2021-ին, սակայն, Հայաստանի քաղաքացիների արտահոսքն ավելի շատ է եղել, քան երկրից մեկնողների ընդհանուր թիվը։ Միգրացիոն ծառայության պետ Արմեն Ղազարյանը բացատրում է, որ արտագաղթն այլ կերպ է հաշվարկվում։

«Միգրացիայի մնացորդը -4200 է։ Երբ համադրում ենք բնական հավելաճի հետ, այսինքն՝ ծնունդների և մահերի տարբերության հետ, որը +1900 է, ընդհանուր մշտական բնակչության նվազումը կազմել է -2300»,- բացատրում է Ղազարյանը։

Ղազարյանը բացատրում է, որ Հայաստանի մշտական բնակչության փոփոխությունն այդքան մեծ չէ։ Շատ ավելի լուրջ փոփոխություններ կան բնակչության կազմի մեջ։

Պետական կառավարման փորձագետ Հովհաննես Ավետիսյաննս ուշադրությունը հրավիրում է նրա վրա, որ սեռատարիքային բաշխումն աղճատվում է։

«Մենք տեսնում ենք, որ աշխատուժն ավելի տարիքով է դառնում։ Այսինքն՝ բնակչության ավելի տարեց խմբերում աշխատուժի թիվը, մարդկանց թիվն ավելի շատ է, քան ավելի երիտասարդ խմբերում։ Երբ դրան գումարած դիտարկում ենք, որ գործազրկությունը երիտասարդների տարիքում, այսինքն՝ 15-24 տարիքային խմբում, շատ ավելի մեծ է՝ շուրջ 33 տոկոս, ապա մենք լրջագույն խնդիրներ ենք տեսնում այս պրոցեսներում»,- մանրամասնում է Ավետիսյանը։

Նա նշում է, որ դա և՛ անվտանգային խնդիր է, քանի որ բանակի համալրումն է վտանգվում, և՛ տնտեսական խնդիր, քանի որ աշխատողների թիվն է պակասում։ Հատկապես դա զգացվում է արական սեռի բնակչության հաշվարկում՝ կանանց համեմատությամբ։

Վերջին 10 տարվա ընթացքում բնակչության կազմը փոփոխվել է։ Դեռ 2010 թվականին աշխատաշուկա մտնող 20-24 տարեկանների թիվը 3 անգամ գերազանցում էր թոշակի գնացողների թվին։

Հիմա այդ տարբերությունը խիստ նվազել է՝ թվերը մոտեցել են իրար։

Հովհաննես Ավետիսյանն այստեղ նաև որակական խնդրի վրա է ուշադրություն հրավիրում՝ աշխատողների և աշխատատեղերի անհամապատասխանության։

Պետական կառավարման փորձագետը բացատրում է, որ լուծումները երկարաժամկետ պետք է լինեն, բայց պետք է սկսվեն շատ շուտ․ ժամանակը քիչ է։

Մանրամասները՝ տեսանյութում։

Գարիկ Հարությունյան