17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Երաժշտական և արվեստի դպրոցներում կիրականացվեն ներառականության ապահովմանն ուղղված դասընթացներ
Հասարակություն
26.01.2022 | 18:07
ԿԳՄՍ նախարարի հրամանով հաստատվել է երաժշտական և արվեստի դպրոցներում ներառականության ապահովմանն ուղղված դասընթացների կազմակերպման ծրագիրը, որն իրականացվում է առաջին անգամ․ տեղեկացնում են ԿԳՄՍՆ-ից։
Երաժշտական և արվեստի դպրոցների ոչ բոլոր ուսուցիչներն են պատրաստ լիարժեք աշխատելու կրթության և զարգացման առանձնահատուկ պայմանների կարիք ունեցող երեխաների հետ, քանի որ չունեն համապատասխան գիտելիքներ և հմտություններ: Ծրագիրը կոչված է՝ լրացնելու այդ բացը:
Ծրագրի նպատակն այն է, որ կրթության առանձնահատուկ պայմանների կարիք ունեցող երեխաները չմեկուսացվեն կրթական համակարգից և չզրկվեն գեղարվեստական որակյալ կրթություն ստանալու իրավունքից: Ծրագրի ընթացքում կապահովվեն անհատական աջակցությանն ուղղված արդյունավետ միջոցներ համապատասխան միջավայրում, ինչն էլ առավելագույնս կնպաստի նրանց ուսումնական ու սոցիալական զարգացմանը:
Ծրագրի արդյունքում ակնկալվում են մանկավարժների ներառական դասավանդման հմտությունների զարգացման ապահովում, գեղարվեստական կրթություն իրականացնող ուսումնական հաստատություններում կրթության և զարգացման առանձնահատուկ պայմանների կարիք ունեցող երեխաների ընդգրկվածության աճ, ինչպես նաև հաշմանդամություն ունեցող երեխաների նկատմամբ կարծրատիպերի վերացում և նրանց կրթության իրավունքի ապահովում:
Ծրագիրը հունվար-մայիս և սեպտեմբեր-նոյեմբեր ամիսներին կանցկացվի Երևանում. այն կիրականացնի «Երեխաների հատուկ ստեղծագործական կենտրոնը» 26 ուսումնական հաստատությունում, և կներառվի շուրջ 500 մասնակից (մանկավարժ): Նախագծում կընդգրկվեն ներառական ոլորտի առաջատար մասնագետներ, որոնց միջոցով տարվա ընթացքում կիրականացվեն դասընթացներ: Ծրագիրը կներառի գործնական և տեսական պարապմունքներ:
