Տոնածառ շիրմաքարի մոտ, խաղալիք՝ հերոսի նկարով․ Ամանորը Եռաբլուրում՝ լուռ ու արցունքոտ. ՏԵՍԱՆՅՈՒԹ

Ամանորը Եռաբլուրում լռության մեջ կդիմավորեն։ Այդ լռությունն այստեղ խախտում են միայն քամուց ծածանվող դրոշներն ու տարբեր կողմերից լսվող լացի ձայները, որոնք ստիպում են յուրաքանչյուրին ապրումակցել․ հարազատ ու օտար այստեղ չկա։ Նույնիսկ վիրավորվում են հարցից՝ այստեղ հարազատ ունե՞ք։

Ժամանակը տարուց ավելի է՝ կանգ է առել շատ ընտանիքներում։ 8-ամյա Էդուարդը հոր մոտ է եկել Ստեփանակերտից։ Հիշում է՝ հայրը 2020-ի սեպտեմբերի 27-ին պատերազմ գնաց, իրեն, որպես տան տղամարդու, ցուցում տալով՝ լավ նայել մայրիկին ու քույրիկին։

Հոր խրատին հետևում է, մայրիկին էլ, քույրիկին էլ լավ է նայում, օգնում է բոլոր հարցերում, բայց հոր բացակայությունը ծանր է տանում՝ ավելացնում է մայրը։

Գառնիկ Գզիրյանցը կամավոր է մեկնել ռազմաճակատ։ 2 օր անց գլխից բեկորային վնասվածքներ է ստացել, Երևանում վիրահատվելուց հետո գիտակցության չգալով՝ 7 օր անց մահացել է։ Ստեփանակերտից հաճախակի չեն կարողանում գալ, բայց գալիս են ամեն առիթով։ Այդպիսի առիթ կա․ երեխաները որոշել են հայրիկի Նոր տարին էլ շնորհավորել։

Ամանորի շունչն ամենուր է․ զարդարված շիրմաքարեր, հերոսների նկարներով փոխարինված տոնածառի խաղալիքներ, փայլեր ու մրգեր։ Այսպես են փորձում մխիթարություն գտնել, բայց ցավը չի մեղմվում անգամ արցունք թափելով ու շիրմաքարի մոտ երկար նստելով։

Տիկին Վեներան սիրելի թոռնիկի հետ երկար զրուցում է։ Գևորգը 2 ամսվա ծառայող է եղել, երբ պատերազմը սկսվել է։ Խոջալուում էր ծառայում, 2020-ի հոկտեմբերի 9-ին վերջին անգամ զանգել է տուն ու ասել, որ ամեն ինչ լավ է, բայց ժամեր անց անօդաչու թռչող սարքի հարվածից զոհվել է։

Գևորգը 2 երազանք ուներ՝ բիզնեսմեն դառնալ ու դուստր ունենալ։ Երազանքները մնացին անկատար։

Այսօր 34 տարեկան կդառնար Սարգիս Սարիբեկյանը։ Ու մինչ մյուս հարազատները կգային, առավոտից մորաքույրն էր եկել, մաքրել տարածքը, թարմ ծաղիկներ դրել։

Սարգիսը հոկտեմբերի 2-ին է զոհվել, հարազատները բոթը 4 օր անց են իմացել․ ընկել է Հաթերքի պաշտպանության ժամանակ։ Ապրում ենք հանուն նրա, որ սերունդներին պատմենք իր մասին, ասում է մորաքույրը՝ արցունքները խեղդելով։ Իսկ շիրմաքարերից ժպտացող դեմքերը ստիպում են գնահատել անկախության ու խաղաղության գինը։

Մանրամասները՝ տեսանյութում։

Սաթենիկ Հայրապետյան