29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Գյումրու ծննդատանը երկու տղաներ են ծնվել․ մեկը տան 9-րդ զավակն է, մյուսը՝ 6-րդ
Հասարակություն
27.12.2021 | 21:40
Գյումրու ծննդատանը նախորդ օրը ծնվել է 40-ամյա Քրիստինա Ղազարյանի 9-րդ զավակը։ 3 կիլոգրամ քաշով ծնված տղային ծնողներն անվանել են Դանիել։ 6 տղաների և 3 դուստրերի մայր Քրիստինայի մեծ որդին շուտով բանակ կզորակոչվի։
«Ես կոչ եմ անում բոլոր հայ մայրերին շատ երեխաներ ունենալ, բոլոր երեխաներն էլ Աստծո տված պարգևն են, Աստված ամեն երեխայի տալիս է իր բաժինը»,- ասում է Քրիստինա Ղազարյանը։
Նույն օրը Գյումրու ծննդատանը լույս աշխարհ է եկել Անի խոշորացված համայնքի բնակչուհի Արմենուհի Չապանյանի 6-րդ զավակը։ 3,5 կլիոգրամ քաշով ծնված երեխային անվանել են Արամ։ Արմենուհին երեք տղա և երեք աղջիկ ունի, մեծ զավակը 10 տարեկան է։
30-ամյա կինը կառավարությանը խնդրում է չանտեսել բազմազավակ ընտանիքներին։
«Բազմազավակությանը ոչ մի ձևով չեն աջակցում, 5 երեխայի համար 50 հազար դրամ եմ ստացել, հիմա 5 հազար էլ այս երեխայի համար պիտի ավելանա ու վերջ։ 55 հազար դրամով վեց երեխա կպահվի՞։ Ամուսինս աշխատանք չունի, գոնե աշխատելու հարցում օգնեն, տան պայմաններն էլ նորմալ չեն, հարմարություններ չունենք», -ասում է Արմենուհի Չապանյանը։
Գյումրու ծննդատան նորածնային բաժանմունքի վարիչ Հայկուշ Ավետիսյանը Factor.am-ի հետ զրույցում տեղեկացրեց, որ թեև տարվա ավարտին դեռ մնացել է չորս օր, սակայն նախորդ տարվա դեկտեմբերի համեմատ ծնունդների քանակը աճել է շուրջ 100-ով ։ Ըստ նրա՝ Գյումրու ծննդատանն այս տարի նորածնի մահացության ոչ մի դեպք չի գանցվել ։
«Տարվա ընթացքում, կապված պանդեմիայի հետ, ունեցել ենք քովիդով հիվանդացած, սուր շնչառական վարակ տարած մայրերից ծնված երեխաներ՝ բնածին թոքաբորբով․ մեզ շատ է օգնել «Մուրացան»-ի անվան բժշկական կենտրոնը։ Տարվա ընթացքում 20 նորածին է տեղափոխվել այնտեղ, բոլորն առողջացած դուրս են գրվել»,- ասաց Հայկուշ Ավետիսյանը։
Արմիկ Մովսիսյան
