Սահմանադրական դատարանը երեկ հակասահմանադրական ճանաչեց առողջապահության նախարար Անահիտ Ավանեսյանի հրամանի ձևակերպումներից մեկը։ Խոսքը վերաբերում է հրամանի այն հատվածին, որտեղ նշված է, որ աշխատող քաղաքացիները որոշակի պարբերականությամբ պետք է իրականացնեն կորոնավիրուսի դեմ ՊՇՌ թեստ՝ «իրենց հաշվին»։
Չպատվաստված քաղաքացիներից ոմանք ոգևորվել էին ՍԴ որոշումից՝ մտածելով, որ ստացվում է՝ թեստավորումն այլևս իրենց հաշվին չի կատարվելու, այնինչ Առողջապահության նախարարությունը կանխեց ոգևորության ալիքի տարածումը։ Գերատեսչությունը շեշտեց՝ «ՊՇՌ թեստավորումն իրականացնում է աշխատողն իր հաշվին» նախադասության մեջ հակասահմանադրական է ճանաչվել միայն «իր հաշվին» բառակապակցությունը:
Սահմանադրական դատարանի որոշմանը հաջորդած ճեպազրույցում որոշակի պարզաբանումներ ներկայացրեց Բարձր դատարան դիմող կողմը՝ ընդդիմադիր «Հայաստան» խմբակցության պատգամավոր Արամ Վարդևանյանը՝ հայտարարելով, որ սա հաղթանակ է իրենց համար։
Առողջապահության նախարարությունը, սակայն, դարձյալ առարկում է՝ պնդելով, որ սա իրենց հաղթանակն է։ Գերատեսչության իրավաբանական վարչության պետ Աննա Մկրտումյանը շեշտում է՝ ՊՇՌ թեստ հանձնելու որոշումը համարվել է սահմանադրական և քաղաքացիները շարունակելու են գործատուին ներկայացնել կա՛մ ՊՇՌ բացասական արդյունքը հավաստող փաստաթուղթ, կա՛մ պատվաստման սերտիֆիկատ:
Վարդևանյանն այստեղ ևս ընդդիմանում է՝ միջազգային փորձը հուշում է, որ այդ պարտականությունը ոչ թե անձի, այլ Հայաստանի Հանրապետության պետական բյուջեի միջոցների վրա պետք է դրվի։ Պատգամավորը նաև հարց է բարձրանում՝ արդյո՞ք նախկինում թեստ հանձնած քաղաքացիները կփոխհատուցվեն։
Այնինչ Սահմանադրական դատարանի որոշման եզրափակիչ մասում որևէ անդրադարձ չի կատարվում որոշման հետադարձ ուժի, այս դեպքում՝ գումարների հետվերադարձին։ «Իրազեկ քաղաքացիների միավորում» ՀԿ ծրագրերի ղեկավար Դանիել Իոաննիսյանի դիտարկմամբ՝ պատգամավորի այսօրինակ հայտարարությունները հանրության մոտ ակնկալիք են ձևավորվում, որ ինչ-որ մեկն իրենց պետք է վերադարձնի անցյալում հանձնած ՊՇՌ թեստավորման գումարները։
Ի վերջո՝ եթե ո՛չ սեփական գրպանի, ո՛չ գործատուի, ո՛չ էլ պետության հաշվին, ապա ո՞ւմ միջոցներով պետք է աշխատակիցը շաբաթը մեկ իրականացնի ՊՇՌ թեստավորում, դեռևս անորոշ է։
Մանրամասները՝ տեսանյութում։
Ռոզա Վարդանյան
