Մասնավոր ընկերությունները պատրաստակամ են աշխատանքի ընդունել պատերազմին մասնակցած տղաներին․ նախարար․ ՏԵՍԱՆՅՈւԹ

Այսօր Գյումրի էր այցելել ՀՀ աշխատանքի և սոցիալական հարցերի նախարար Նարեկ Մկրտչյանը։ Նա լրագրողների հետ զրույցում նշեց, որ իրենց գերատեսչության կարևոր խնդիրներից է պատերազմին մասնակցած ու հաշմանդամություն ձեռք բերած զինծառայողների կայուն զբաղվածության հարցը լուծելը։

«Ունենք բազմաթիվ ծրագրեր պատերազմին մասնակից շուրջ 500 զինվորների համար, Շիրակի մարզպետի հետ քննարկեցինք այս մարզից հնարավոր շահառուներ ներառելու հարցը»,-ասաց նախարարը։

Նա նաև նշեց, որ արդեն իսկ պայմանավորվածություններ ուներ տարբեր տեխնոլոգիական կենտրոնների, նաև Բարձր տեխնոլոգիական արդյունաբերության նախարարության հետ՝ զինծառայողներին վերապատրաստելու, կրթելու, հետագայում աշխատանքի տեղավորելու շուրջ։

«Կան ծրագրեր, ուղղակի ծրագրերից որոշները գործում են Երևանում, դա՛ ենք քննարկում՝ ինչպես անել, որ Շիրակի մարզի շահառուներին ևս հասանելի դարձնենք այդ ծրագրերին։ Օրինակ՝ ֆրանսիական ընկերություններից մի քանիսի հետ ունենք համագործակցություն, որոնք որ առցանց տարբերակով են վերապատրաստման ծրագրեր մատուցում, դա նույնպես կարելի է հասանելի դարձնել հեռավոր բնակավայրերում ապրող մեր շահառուներին»,- ասաց Նարեկ Մկրտչյանը։

Մեր հարցին՝ արդյոք մասնավոր ընկերությունները բարյացակա՞մ են հաշմանդամություն ունեցող անձանց աշխատանքի տեղավորելու հարցում, Հայաստանի Հանրապետությունում այդ խնդիրը միշտ եղել է, նախարարը պատասխանեց․

«Պատերազմից հետո պատասխանատվության զգացումը բոլոր այն տղաների հանդեպ, որոնք որ իրենց առողջությունը չեն խնայել և մասնակցել են պատերազմական գործողություններին, էլ ավելի է մեծացել մեր հասարակության շրջանում։

Այս արձանագրումը պիտի անենք, ունենք բազմաթիվ առաջարկներ տարբեր մասնավոր ընկերությունների կողմից, որոնք, ըստ էության, պատրաստակամություն հայտնում են իրենց ծրագրերում ընդունել աշխատանքի, մինչև աշխատանքի ընդունելը կրթություն տալ, վերապատրաստել և այլն։

Դրանից բացի, մենք՝ որպես կառավարություն, հնարավորություններ ենք ընձեռում նրանց ավելի հարմար պայմաններ ստեղծել հաշմանդամություն ունեցող անձանց աշխատանքի ընդունելու։ Կապ չունի դա եղել է 90-ական թվականների պատերազմը, 2016-ի, թե վերջին պատերազմը, երբևէ ռազմական գործողություններին մասնակցած և հաշմանդամություն ձեռք բերած անձանց աշխատանքի տեղավորման դեպքում պետությունը փոխհատուցում է մինչև հարյուր հազար դրամ եկամտահարկը մեկ տարի ժամկետով, ինչպես նաև գումար է տրամադրում գործատուին աշխատավայրը հաշմանդամություն ունեցող անձի կարիքներին հարմարեցնելու»։

Արմիկ Մովսիսյան