16-ամյա աղջկա սպանության մեղադրանքով արդարացվածները կրկին կանգնեցին դատարանի առաջ. ՄԻԵԴ վճիռն անտեսվեց. ՏԵՍԱՆՅՈՒԹ

13 և 9 տարի անազատության մեջ անցկացնելուց և 2023թ. դեկտեմբերին արդարացվելուց հետո վարդենիսցի ամուսիններ Նարինե և Բագրատ  Նալբանդյանների գործը, հնարավոր է կրկին քննվի: Վերաքննիչ քրեական դատարանը՝ դատավորներ Գառնիկ Ստեփանյանի, Լուսինե Աբգարյանի և Վաչե Մարգարյանի նախագահությամբ, օրեր առաջ բավարարեց արդարացման դեմ բերված Գլխավոր դատախազության բողոքը և վճռեց գործն ուղարկել Գեղարքունիքի մարզի առաջին ատյանի դատարան՝ նոր քննության։

20 տարի առաջ տեղի ունեցած սպանության մղձավանջը, փաստացի, դեռ շարունակում է հետապնդել Նալբանդյաններին։ 

Ըստ 2004 թվականին Նալբանդյան ամուսիններին առաջադրված պաշտոնական մեղադրանքի՝ հունիսի 8-ին անչափահաս Սյուզաննա Սարգսյանը գնացել էր իր համադասարանցու՝ Արևիկ Նալբանդյանի տուն, որտեղ վիճելով նրա մոր` Նարինե Նալբանդյանի հետ, ապակե շշով դեմքին մի քանի հարված էր ստացել: Ըստ պաշտոնական վարկածի՝ Բագրատ և Նարինե Նալբանդյանները մետաղալարով կապել էին ուշագնաց Սյուզաննայի ձեռքերը, փակել բերանը և 5-6 ժամ թողել էին խոհանոցում, ապա, դեռևս չմահացած աղջկան կեսգիշերին նետել էին իրենց տնից ոչ հեռու գտնվող մազութի հորը, որտեղ էլ Սյուզաննան մահացել էր: Սա՝ պաշտոնական վարկածով, որը խիստ տարբերվում է Նալբանդյանների՝ դեռևս տարիներ առաջ Factor TV-ին  պատմած տարբերակից։ Բագրատի խոսքով՝ Սյուզաննային մի քանի օր գտնել չի հաջողվել, իսկ ոստիկանները նպատակաուղղված իրենց փնտրտուքը շարունակել են իրենց տնից 20 մետր հեռու գտնվող մազութի հորում:

Ըստ Բագրատի, այստեղից էլ սկսվել է ճնշումների շղթան։ Դատախազության և ոստիկանության համակարգի ներկայացուցիչները դաժանորեն ծեծել ու նվաստացրել են ոչ միայն երկրորդ կարգի հաշմանդամություն ունեցող Բագրատին, կնոջը, այլև նրանց անչափահաս դստերը:

Ավելի վատ վիճակում են գտնվել կինը՝ Նարինեն և նրանց դեռահաս աղջիկը՝ Արևիկը: Նրանց պատմելով՝ ոչ միայն անդադար ծեծել են, սպառնացել, հայհոյել, փակել առնետներով լի մութ սենյակում, այլևս աղջկան ստիպել են հանվել, իսկ Նարինեին սպառնացել՝ եթե իր վրա չվերցնի սպանությունը, աղջկան կտեսնի բռնաբարված: Ըստ մոր՝ իրեն այլ ելք չի մնացել, քան գրել այն, ինչ իրեն պարտադրել են։ Խոշտանգումների ներքո նրանցից կորզվել են ինքնախոստովանական ցուցմունքներ և 7 ամիս տևած նախաքննությունից ու դատաքննությունից հետո՝ 2005 թվականի փետրվարի 4-ին Գեղարքունիքի մարզի ընդհանուր իրավասության դատարանի դատավոր Դավիթ Բալայանը վճռում է Բագրատ Նալբանդյանին դատապարտել 9, իսկ Նարինե Նալբանդյանին՝ 14 տարի ազատազրկման՝ առանց հաշվի առնելու 3 անչափահաս երեխա ունենալու հանգամանքը։ Բագրատ Նալբանդյանն ամբողջությամբ կրել է դատարանի նշանակած պատիժը, իսկ Նարինե Նալբանդյանը 14 տարվա ազատազրկման դատավճռից պատիժը կրել է մոտ 13 տարի: Ներպետական ատյաններում արդարության չհասնելուց հետո Նալբանդյանները դիմել էին ՄԻԵԴ։

Եվ մինչ Նալբանդյան ընտանիքն արդեն պատրաստվում էր ՀՀ-ում դիմել դատարան և փոխհատուցում պահանջել անարդարացիորեն անազատության մեջ անցկացրած ծանր տարիների համար, Գլխավոր դատախազությունը բողոքարկեց արդարացման դեմ

Նալբանդյանները և փաստաբան Մարգարյանը չեն բացառում նաև նախկինում գործը քննած դատաիրավական համակարգի ներկայացուցիչների միջնորդությունը վերաքննիչ դատական ակտում։

Թեև դեռևս Վերաքննիչ դատարանի կողմից Նալբանդյանները չեն ստացել դատական ակտն ամբողջությամբ, այնուամենայնիվ փաստաբան Մարգարյանը նշում է՝ այն բողոքարկելու են Վճռաբեկ դատարան։ Եթե այնտեղ էլ արդյունքի չհասնեն, գործը կգնա Գեղարքունիքի մարզի ընդհանուր իրավասության դատարան՝ նոր քննության։

Մանրամասները՝ տեսանյութում։

Ռոզա Վարդանյան