10.02.2026 | 23:52
Հայաստանի մի շարք հասցեներում էլեկտրաէներգիայի անջատումներ կլինեն
Մարությանի վերաբերյալ հոդվածից հետո՞ է որոշվել նրան պաշտոնանկ անել. ավագանու անդամի պարզաբանումը
Քաղաքականություն
15.12.2021 | 22:02
Factor TV-ն արդեն հայտնել է, որ Երևանի ավագանու «Իմ քայլը» խմբակցությունում գործող քաղաքապետ Հայկ Մարությանին անվստահություն հայտնելու եղանակով պաշտոնանկ անելու գործընթաց է սկսվել։
Ինչո՞ւ հանկարծ նման գործընթաց սկսվեց. Factor TV-ի հետ զրույցում ավագանու «Իմ քայլը» խմբակցության անդամ Արմեն Կոտոլյանը հարցին այսպես արձագանքեց. «Հանկարծ չի սկսվել։ Պատճառներ կան, բայց դրանց վերաբերյալ ավելի ուշ պարզաբանում կտրվի»։
Հարցին՝ «Իմ քայլում» դժգոհությո՞ւն կար Մարությանի աշխատանքից, Կոտոլյանն ասաց, որ ինքն անձամբ բազմիցս խոսել է խնդիրների մասին և քննադատել քաղաքապետին։
Իսկ Մարությանին անվստահություն հայտնելու գաղափարն առաջացել է օրեր առաջ նրա վերաբերյալ ՀԺ-ում գրված հոդվածից հետո՞, թե՞ խմբակցության ղեկավար Արմեն Գալջյանի՝ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի հետ հանդիպման արդյունքում՝ Կոտոլյանը վստահեցրեց. «Դա որոշվել է բոլոր տեսակի հոդվածներից ու քննարկումներից առաջ»։
Նշենք, որ քաղաքապետին պաշտոնանկ անելու համար անհրաժեշտ է առնվազն 33 ստորագրություն։ Նախնական տվյալով՝ «Իմ քայլի» 63 հոգանոց խմբակցության անդամներից 39-ը արդեն իսկ մասնակցել են ստորագրահավաքին։
Հավելենք, որ հոդվածում, մասնավորապես, ասվում էր. «Ըստ շրջանառվող տեղեկությունների՝ պատերազմի ավարտից հետո Հայկ Մարությանը դիմում է ներկայացրել «Քաղաքացիական պայմանագիր» կուսակցությունից հեռանալու մասին և խզել հարաբերություններն իշխող ուժի անդամների հետ:
Այժմ, շրջանառվող տեղեկությունների համաձայն, Մարությանը իր քավորի՝ Ամարասի Արթուրի միջոցով նաև սերտ հարաբերություններ է հաստատել մեկ այլ գեներալի՝ ԱԺ «Հայաստան» խմբակցության ղեկավար Սեյրան Օհանյանի հետ, որը նույնպես Ամարասի Արթուրի սանիկն ու մտերիմ ընկերն է: Տեղեկություններ են շրջանառվում նաև այն մասին, որ պատերազմի ավարտից հետո Մարությանը Սեյրան Օհանյանի միջնորդությամբ հանդիպել է Ռոբերտ Քոչարյանի հետ»։
Մերի Մարտիրոսյան
