Ուկրաինայի կառավարությունն առաջարկում է տուգանքներ կիրառել ռուսական ագրեսիան հերքելու համար

Ուկրաինայի կառավարությունն առաջարկում է վարչական պատասխանատվություն սահմանել այն քաղաքական գործիչների համար, որոնք հրապարակայնորեն հերքում են Ուկրաինայի դեմ Ռուսաստանի զինված ագրեսիան։ Երկու համապատասխան օրինագծերը հաստատվել են Նախարարների կաբինետի նիստում, որոնք կուղարկվեն Գերագույն ռադա՝ քննարկման, գրում է DW-ի ռուսական ծառայությունը:

Վարչապետ Դենիս Շմիգալը նշել է, որ առաջարկվող միջոցառումներն ուղղված կլինեն ինչպես ուկրաինացի, այնպես էլ արտասահմանյան քաղաքական գործիչների դեմ։

«Մեր և օտարերկրյա բոլոր քաղաքական գործիչները, որոնք խոսում են Ուկրաինայում ենթադրյալ քաղաքացիական պատերազմի, «ոչ ուկրաինական» Ղրիմի մասին, պետք է պատասխանատվության ենթարկվեն»,- Շմիգալի խոսքերն է մեջբերում «Ուկրինֆորմ»-ը։

Առաջին օրինագծի համաձայն՝ անօրինական են ճանաչվում Ռուսաստանի Դաշնության զինված ագրեսիան Ուկրաինայի դեմ և ուկրաինական տարածքների ժամանակավոր օկուպացումը Դոնեցկի և Լուգանսկի մարզերում, ինչպես նաև Ղրիմի անեքսիան օրինականացնելու փորձերը, ինչը հանգեցնում է իրավական հետևանքների։

Միևնույն ժամանակ, «հրապարակային ժխտման» ներքո առաջարկվում է հասկանալ մեկից ավելի անձանց ուղղված առնվազն մեկ բացահայտ կոչ, որն իրականացվում է «մեծ մասամբ, բայց ոչ բացառապես, մամուլում, ռադիոյով, հեռուստատեսությամբ կամ օգտագործելով այլ լրատվամիջոցներով հրապարակումների միջոցով»։

Երկրորդ օրինագիծը վարչական պատասխանատվություն է սահմանում նման իրավախախտումների համար․ տուգանք՝ 17-ից 34 հազար գրիվնայի չափով (համապատասխանաբար, մոտ 555 և 1110 եվրո):

Տաթև Ֆռանգյան