11.02.2026 | 10:16
ՀՀ-ին են վերադարձվել շուրջ 60 միլիարդ 553 միլիոն դրամ արժեքով հողատարածք և 5 անշարժ գույք․ Դատախազություն
Տարածաշրջանի խնդիրները պետք է լուծվեն տարածաշրջանի ներսում, արտաքին միջամտության կարիք չկա․ Ռաիսին՝ Էրդողանին
Քաղաքականություն
09.12.2021 | 16:42
Իրանի և Թուրքիայի նախագահներ Էբրահիմ Ռաիսին և Ռեջեփ Թայիփ Էրդողանը հեռախոսազրույց են ունեցել, որի ընթացքում քննարկել են ահաբեկչության դեմ պայքարին ու երկկողմ համագործակցությանը վերաբերող հարցեր: Tasnim-ի փոխանցմամբ՝ Ռաիսին հայտարարել է, որ տարածաշրջանային խնդիրները պետք է լուծվեն տարածաշրջանի ներսում։
«Մենք ընդգծում ենք, որ տարածաշրջանային խնդիրները պետք է լուծվեն տարածաշրջանի ներսում և տարածաշրջանի երկրների ակտիվ մասնակցությամբ, և արտաքին միջամտության կարիք չկա»,- նշել է Իրանի նախագահը։
Ահաբեկչության դեմ պայքարում Թեհրանի և Անկարայի միջև սերտ համագործակցության կոչ անելով՝ Իրանի նախագահ Էբրահիմ Ռաիսին ընդգծել է, որ ահաբեկչության դեմ պայքարի հիմնական սկզբունքը հարգանքն է այլ ազգերի ինքնիշխանության նկատմամբ։
Ռաիսին նաև ընդգծել է ահաբեկչության դեմ պայքարում երկու երկրների համագործակցության անհրաժեշտությունը։
«Ահաբեկչության դեմ պայքարի հիմնական միջոցը երկրների ինքնիշխանությունը հարգելն է, և Իրանի Իսլամական Հանրապետությունը, ահաբեկչության դեմ պայքարի իր գերազանց ցուցանիշներով, ողջունում է ահաբեկչության դեմ պայքարում բոլոր երկրների հետ համագործակցությունը»,- ասել է նա։
Կարևորելով Թեհրան-Անկարա հարաբերությունների կարևորությունը տնտեսական և առևտրային ոլորտներում՝ Ռաիսին ասել է. «Շուտով Թեհրանում համատեղ գագաթնաժողովի անցկացմամբ համագործակցության զարգացումը կմտնի նոր փուլ»։
Իր հերթին, Էրդողանը կարևորել է երկու հարևանների համագործակցությունը հատկապես տնտեսության և անվտանգության ոլորտում։
«Տարածաշրջանի երկրների միջև գերիշխում է համագործակցության գաղափարը, և վերջին այցերն ու խորհրդակցությունները ցույց են տալիս դրա հաջողությունը։ Իմ ապագա այցով Թեհրան, երկու երկրների հարաբերությունները զարգացման նոր էջ կմտնեն»,- հայտարարել է Էրդողանը։
Տաթև Ֆռանգյան
