Ձեր քաղաքական շեֆը ամենաշատն է հայհոյվում․ Վիգեն Խաչատրյանը՝ «Հայաստան» խմբակցության պատգամավորներին․ ՏԵՍԱՆՅՈՒԹ

«Հայաստան» խմբակցությունն այսօր նախագիծ էր ներկայացրել, որն առաջարկում է ուժը կորցրած ճանաչել հայհոյանքը քրեականացնող հոդվածը:

«Քաղաքացիական պայմանագիր» պատգամավոր Վիգեն Խաչատրյանը ԱԺ ամբիոնից խոսեց հայհոյանքը քրեականացնող հոդվածի կարևորության մասին:

Քրեական օրենսգրքում ավելացված տողը, ըստ ընդդիմադիրների, վտանգում է ժողովրդավարությունը, ու այս կարգավորմամբ նպատակ է դրվել քրեաիրավական միջոցների գործադրման սպառնալիքով սահմանափակել ազատ խոսքը, հրապարակային քննադատությունը` հատկապես բարձրաստիճան պաշտոնյաների հասցեին:

«Ակնհայտ է, որ հենց այնպես չէ, որ այս օրենքը փոխվել է և քրեականացվել, որովհետև մարդիկ չափն անցել են: Իմ խորին համոզմամբ՝ օրենքն այն բանի համար չի ընդունվում, որ սկսենք մարդկանց պատժել: Այս օրենքը պետք է կրի կանխարգելիչ բնույթ, և մենք պիտի միասին աշխատենք այնպես, որ պատժելու կարիք չառաջանա, մի բան, որին մենք պատրաստ չենք»,- նշեց Խաչատրյանը:

Նրա խոսքով՝ միջանձնային հարաբերություններում պետք է փոխվի արմատացած մշակույթը:

«Ոչ թե պայքարենք միմյանց դեմ ու ոչնչացնենք միմյանց, այլ մրցակցենք: Մրցակցային այս մշակույթը երբ մտնի, չեն հայհոյի: Երբ մշակույթը գնում է դեպի ոչնչացումը, հայհոյելու են»,- նշեց Խաչատրյանը:

«Ասում են՝ մի մարդու եք պաշտպանում: Ինչ-ինչ, բայց ձեր շեֆին մենք պաշտպանելու կարիք ու ցանկություն չունենք, որն ամենաշատն է այսօր Հայաստանում հայհոյվում: Հերիք է մի մարդուց խոսեք, դադրե՛ք մի մարդու սպասարկելուց»,- նշեց իշխանական պատգամավորը:

Մանրամասները՝ տեսանյութում: