Մոռացե՞լ եք՝ ընտրությունների գիշերը Երևանում ինչ էր տեղի ունենում. Փաշինյան․ ՏԵՍԱՆՅՈՒԹ

ՀՀ արդարադատության նախարար Կարեն Անդրեասյանը Կառավարության նիստի ընթացքում ներկայացրեց ՀՀ քաղաքացիական օրենսգրքում և հարակից օրենքներում փոփոխություններ նախատեսող օրենսդրական փաթեթը, որով առաջարկվող կարգավորումների նպատակն ինքնակամ շինարարության դեմ պայքարում առավել արդյունավետ իրավական մեխանիզմների նախատեսումն է:

Վարչապետ Նիկոլ Փաշինյանը հետաքրքրվեց. «Հիմա մենք մինչև ո՞ր ամսաթիվը կառուցված ինքնակամ շինություններին ենք օրինականացման հնարավորություն տալիս՝ մինչև 2021թ. հունվարի 1-ը, թե՞ մինչև 2022թ. հունվարի 1-ը»:

Կարեն Անդրեասյանը պատասխանեց, որ ամսաթիվ չի նշվում. նախարարի խոսքով՝ օրենսդրական կարգավորումը վերաբերելու է այն ինքնակամ շինություններին, որոնք կառուցել են մինչև օրենքի ուժի մեջ մտնելը:

Վարչապետը նշեց, որ համաձայն չէ այդ մոտեցման հետ.  «Հիմա այս հայտարարությունն անելուց հետո որոշ մարդիկ որոշ տեղերում բահերը կվերցնեն և կգնան կառուցելու: Դուք մոռացե՞լ եք ընտրությունների գիշերը ինչ էր տեղի ունեցել Երևանում: Մի գիշերվա մեջ Աջափնյակի կեսում խանութ էին սարքել: Հետո ինչքան ջանք պահանջվեց ինձնից, քաղաքապետարանից, ոստիկանության, մյուս տեսչական մարմիններից, որ ուժային ձևով կանխենք: Չէ, այդպես չի լինի: Ամբողջ խնդիրն այն է, որ մենք հետին ամսաթիվ պետք է ֆիքսենք, որ մարդկանց մոտիվացիա չտանք նոր ինքնակամ շինություններ կառուցելու»:

Մանրամասները՝ տեսանյութում: