26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Բայդենի և Պուտինի բանակցությունները. ինչ են պատմել Սպիտակ տունն ու Կրեմլը դրանց մասին
Քաղաքականություն
08.12.2021 | 11:43
ԱՄՆ նախագահ Ջո Բայդենը և ՌԴ նախագահ Վլադիմիր Պուտինը տեսակապով բանակցություններ են վարել, որոնք տևել են երկու ժամ։ Զրույցի հիմնական թեման եղել է Ուկրաինայի սահմանի մոտ ռուսական զորքերի կուտակումը և Ուկրաինա ռուսական հնարավոր ներխուժման վերաբերյալ Արևմուտքի մտահոգությունները։
Բանակցությունների ընթացքում Սպիտակ տունն իր անհանգստություն է հայտնել Ուկրաինայի սահմանների մոտ ռուսական զորքերի կուտակման հետ կապված, հայտնել է Սպիտակ տան մամուլի ծառայությունը։
«Բայդենը ԱՄՆ-ի և մեր եվրոպացի դաշնակիցների խորը մտահոգությունն է հայտնել Ուկրաինայի շուրջ ռուսական զորքերի տեղակայման հետ կապված իրավիճակի սրման կապակցությամբ և ընդգծել, որ ԱՄՆ-ը և մեր դաշնակիցները իրավիճակի սրման դեպքում կպատասխանեն վճռական՝ տնտեսական և այլ միջոցներով»,- ասված է բանակցություններից հետո Սպիտակ տան տարածած հայտարարության մեջ։
Զրույցի ընթացքում Բայդենը հայտարարել է Ուկրաինայի տարածքային ամբողջականությանն ու ինքնիշխանությանը աջակցելու մասին և ապաէսկալացիայի, ինչպես նաև դիվանագիտությանը վերադառնալու կոչ արել», ասվում է Սպիտակ տան հայտարարության մեջ։
Նաև բանակցությունների ընթացքում Պուտինն ու Բայդենն անդրադարձել են կիբերանվտանգության, ռազմավարական կայունության, ինչպես նաև Ռուսաստանի և ԱՄՆ-ի համատեղ աշխատանքին տարածաշրջանային հարցերի շուրջ, այդ թվում՝ Իրանի հետ հարաբերություններին, հայտնել է Սպիտակ տունը։
Կրեմլն իր հերթին հաղորդել է, որ Պուտինի և Բայդենի բանակցությունները եղել են անկեղծ և գործնական։ Հայտարարության մեջ ասվում է, որ զրույցի ընթացքում գերակշռող տեղ են զբաղեցրել «ուկրաինական ներքաղաքական ճգնաժամի և 2015 թվականի մինսկյան համաձայնագրերի իրականացման գործում առաջընթացի բացակայության հետ կապված հարցերը»։
«Ռուսաստանի նախագահը կոնկրետ օրինակներով ցույց է տվել Կիևի ապակառուցողական գիծը, որն ուղղված է մինսկյան պայմանավորվածությունների և նորմանդական ձևաչափով ձեռք բերված համաձայնությունների ամբողջական ապամոնտաժմանը, լուրջ մտահոգություն է հայտնել Դոնբասի դեմ Կիևի սադրիչ գործողությունների կապակցությամբ»,- ասվում է Կրեմլի տարածած հայտարարության մեջ։
Ռուսական կողմը հաստատել է նաև, որ Բայդենը զրույցի ժամանակ զգուշացրել է պատժամիջոցների մասին, որոնք ԱՄՆ-ն պատրաստ կլինի կիրառել՝ Ուկրաինայի հետ սահմանին իրավիճակի սրման դեպքում։
«Ջո Բայդենն իր հերթին ընդգծել է ուկրաինական սահմանների մոտ ռուսական զորքերի տեղաշարժերի, իբր, սպառնալից բնույթը և նախանշել պատժամիջոցների միջոցներ, որոնք ԱՄՆ-ը և նրա դաշնակիցները պատրաստ կլինեն կիրառել իրավիճակի հետագա սրման դեպքում»,- հայտնել են Կրեմլից։
Ի պատասխան՝ Պուտինը հայտարարել է, որ ՆԱՏՕ-ն վտանգավոր փորձեր է անում՝ գրավելու Ուկրաինայի տարածքը և զարգացնում է իր ռազմական հնարավորությունները Ռուսաստանի սահմանների մոտ։
«Հետևաբար, Ռուսաստանը լրջորեն շահագրգռված է հուսալի, օրինականորեն ամրագրված երաշխիքներ ձեռք բերելու հարցում, որոնք կբացառեն ՆԱՏՕ-ի ընդլայնումը դեպի արևելք և հարձակողական հարվածային զենքի համակարգերի տեղակայումը Ռուսաստանին հարակից երկրներում»,- ասել է ՌԴ նախագահը։
Զրույցի ընթացքում Պուտինը նաև Վաշինգտոնին առաջարկել է չեղարկել դիվանագիտական ներկայացուցչությունների աշխատանքի հետ կապված կուտակված սահմանափակումները։
«Ռուսական կողմն առաջարկել է չեղարկել դիվանագիտական ներկայացուցչությունների գործունեության հետ կապված բոլոր կուտակված սահմանափակումները, որոնք կարող են ծառայել երկկողմ հարաբերությունների այլ ասպեկտների կարգավորմանը»,- ասվում է Կրեմլի հայտարարության մեջ։
Հիշեցնենք, որ սրանք Պուտինի և Բայդենի երկրորդ բանակցություններն էին այս տարվա ընթացքում։ Հուլիսին նրանք անձամբ հանդիպել էին Ժնևում։
Տաթև Ֆռանգյան
