Գերիներին Ալեն Սիմոնյանը դասալի՞ք է համարում. աղմկահարույց տեսագրության հետքերով․ ՏԵՍԱՆՅՈւԹ

Այսօր առավոտյան տելեգրամյան ալիքներից մեկում գաղտնի նկարահանված տեսանյութ տարածվեց Ազգային ժողովի նախագահ Ալեն Սիմոնյանի մասնակցությամբ։ Ինչ-որ անձի հետ երկխոսության ժամանակ Սիմոնյանն անդրադառնում է Բաքվի բանտերում հայ գերիների մնալու մասին զրուցակցի հարցին։

«Հիմա կներեք, մի քիչ կարող ա սխալ բան եմ ասում, բայց ես էդ գերիներին համարում եմ, որ արդեն իրանք չկան, իմ համար չկան։ Իսկ գիտե՞ք էդ գերիներն ովքեր են, էն մարդիկ են, որոնք զենքը դրել, փախել և մոլորվել են։ Ձեզ չի՞ հետաքրքրում՝ ինչի՞ էդ գերիների ծնողները հիմա ակտիվ չեն։ Որովհետև էդ մարդիկ գիտեն, որ դասալքություն են արել»,- զրույցի ընթացքում ասել է ԱԺ նախագահը։

Լրատվամիջոցներից մեկի տեղեկության համաձայն՝ այս նկարահանումը տեղի է ունեցել Փարիզում, որտեղ Ալեն Սիմոնյանը գտնվում էր Ֆրանսիայի Սենատի հրավերով։ Համացանցում տեսանյութի տարածվելուց ժամեր անց Ալեն Սիմոնյանն ԱԺ-ում ճեպազրույց տվեց։ Լրագրողների հարցին ի պատասխան՝ Սիմոնյանը հայտարարեց՝ տեսանյութը մոնտաժված է։

Տեսանյութն իսկապես մոնտաժված էր․ դրա հրապարակումից շատ չանցած Սիմոնյանի օգնական Հայկ Ստեփանյանը տարածեց չմոնտաժված տարբերակը։ Այստեղից պարզ երևում է, որ մի քանի մտքեր դուրս են մնացել նախնական տարբերակից։

Մինչ Ալեն Սիմոնյանն արդարանում էր, Ազգային ժողովի ընդդիմադիր պատգամավորները պատրաստվում են պահանջել խորհրդարանի նախագահի պաշտոնից Սիմոնյանի հրաժարականը։ Նրանց պնդմամբ՝ իրենք բազմիցս են դիմել իշխանությանը՝ խորհրդարանական օրակարգում ներառել անհետ կորածների, գերիների, ռազմագերիների և նրանց հայրենադարձության մասին հրատապ հարցերի քննարկումը, սակայն ՔՊ-ականները մերժել են՝ պնդելով դրանք անցկացնել դռնփակ։ Ընդդիմադիր պատգամավոր Աննա Գրիգորյանի խոսքով՝ Սիմոնյանի այսօրինակ մտքերից հետո իրենց համար պարզ է, թե ինչու է իշխանությունը նախընտրում փակ ֆորմատը։

Մինչ խորհրդարանում շարունակվում է իշխանություն-ընդդիմություն հակամարտությունը, որը երբեմն իսկական մարտի է վերածվում, քաղաքացիական հասարակության ներկայացուցիչները մտահոգված են․ Սիմոնյանի արտահայտությունները պետք է գնահատանքի արժանանան։ Ժուռնալիստների «Ասպարեզ» ակումբի խորհրդի նախագահ Լևոն Բարսեղյանի դիտարկմամբ՝ հրապարակված, այսպես ասած, չմոնտաժված տարբերակը ևս խնդրահարույց է։

Բարսեղյանը ևս այն կարծիքին է, որ Ալեն Սիմոնյանի այսօրինակ դիտարկումները պետք է պաշտոնանկության հիմք դառնան։ Նրա համոզմամբ՝ այս տեսագրությունը Բաքվի համար կարող է լավ առիթ լինել՝ գերիներին ցույց տալու Հայաստանի վերաբերմունքն իրենց նկատմամբ։

Մանրամասները՝ տեսանյութում։

Ռոզա Վարդանյան