Կանցկացվի «Հայրենադարձության շաբաթ» միջոցառումների շարքը

եկտեմբերի 13-19-ը ՀՀ սփյուռքի գործերի գլխավոր հանձնակատարի գրասենյակը կազմակերպում է Հայրենադարձության շաբաթ: Յոթնօրյա միջոցառումների շարքը նախատեսված է այն սփյուռքահայերի համար, ովքեր ցանկանում են իրենց կյանքը շարունակել Հայաստանում, ովքեր մտածում են հայրենադարձության մասին կամ պարզապես տեղեկացված չեն հայրենիք վերադարձի հնարավորությունների վերաբերյալ: Այս մասին տեղեկացնում են ՀՀ սփյուռքի գործերի գլխավոր հանձնակատարի գրասենյակից։

Շաբաթն անցկացվելու է առաջին անգամ և բաղակացած է օնլայն և օֆլայն միջոցառումներից, հայրենադարձների դեռևս չպատմված ֆոտո և վիդեո պատմություններից:

Արևմտահայերեն ուղիղ միացումը դեկտեմբերի 13-ին կանդրադանա Միջին Արևելքի հայ համայնքների իրավիճակին՝ Լիբանանից, Սիրիայից և Քուվեյթից  հայրենադարձների հետ քննարկման ձևաչափով:

Դեկտեմբերի 14-ին իսպաներեն ուղիղ միացմամբ արգենտինահայ և ուրուգվահայ հայրենադարձները կխոսեն Հայաստանում մասնագիտական աճի հնարավորությունների մասին:

Դեկտեմբերի 15-ին Ֆրանսիայից և Բելգիայից հայրենադարձները ֆրանսերենով կպատմեն Հայաստանի կենսակերպի և ապրելաոճի մասին:

Դեկտեմբերի 16-ին ռուսաստանահայ հայրենադարձները ռուսերենով կպատմեն անհատական և ընտանեկան հայրենադարձության խնդիրների ու դրանց հաղթահարման հնարավորությունների մասին:

Դեկտեմբերի 17-ին հայրենադարձ երիտասարդները ՀԲԸՄ հայաստանյան գրասենյակում գինու շուրջ կապերի հաստատման և ծանոթությունների ընդլայնման միջոցառում կունենան:

Դեկտեմբերի 18-ին ԱՄՆ-ից, Կանադայից և Գերմանիայից Հայաստան ժամանած և այստեղից հեռավար աշխատանք իրականցնող մասնագետներն անգլերենով կներկայացնեն Հայաստանից աշխարհի համար հեռավար աշխատանքի հնարավորություններն ու առավելությունները:

Դեկտեմբերի 19-ին շաբաթը կեզրափակվի հայրենադարձ ընտանիքների երեխաների մասնակցությամբ ամանորյա միջոցառմամբ:

Բոլոր միջոցառումների մասին թարմացումները կարող եք գտնել հղմամբ՝ https://bit.ly/3rFdx4r: