15.12.2025 | 11:34
6 տարի էր նախատեսված, մենք 1,6 տարում ավարտում ենք․ Ավինյանը՝ Ազարյանի անվան դպրոցի մասին. ՏԵՍԱՆՅՈՒԹ
Արտադրված է Հայաստանում․ «Սկորպիոն» մարտական ռոբոտի «խայթոցը» կարող է մահացու լինել հակառակորդի համար․ ՏԵՍԱՆՅՈՒԹ
Քաղաքականություն
07.12.2021 | 19:45
«Սկորպիոնը» Հայաստանում նախագծված, հավաքված և փորձարկվող ռազմական ռոբոտ է, արժեքը՝ 43 հազար դոլար։ Կարողանում է արագ տեղափոխվել բարդ տեղանքում, խոցել թշնամուն տարբեր զենքերով։ Այն զրահապատ է, դժվար է խոցվում։
Հեռակառավարվում է՝ կրկնելով օպերատորի գլխի շարժումները, կարող է խնդիրներ լուծել թշնամու թիկունքում։ Կապի հեռավորությունը 10 կմ է։ Օրինակ, կարելի է նստել Սիսիանում, իսկ սարքն ուղարկել Իշխանասարի դիրքերի ուղղությամբ՝ խնդիրներ կատարելու։
Նախագծող IsaTech ընկերությունը «Սկորպիոնի» առաջին տարբերակը ներկայացրել է դեռ 2018 թվականին, հետո՝ կատարելագործել։ Հիմա ռոբոտը կարող է կրել և՛ ինքնաձիգ, և՛ հակատանկային նռնականետ։
«Իրեն ուղղակի կարելի է ուղարկել թիկունք, որ մինչև այժմ միայն հատուկ ստորաբաժանումներն էին այդպես կարողանում անել՝ իրենց կյանքն ուժեղ վտանգի ենթարկելով»,- նշեց «Սկորպիոն» ռոբոտը նախագծող IsaTech ընկերության տնօրեն Վահան Իսաջանյանը։
Ընկերությունն այս փուլում կանգ է առել, պնդում է՝ պետական գերատեսչությունների հետ աշխատանքը դադարել է։ Հենց այդ հարցով նախագծողը հանդես էր եկել տեսաուղերձով։ Խնդիրների մասին ասաց նաև Factor TV-ի հետ զրույցում։
Առաջարկում է իրականացնել դրամահավաք, պատրաստել այս ռոբոտներից մի քանի հատ, մարզումներ անցկացնել, որպեսզի համապատասխան գերատեսչություններին ցույց տա, որ դրանք իրականում պետք են Զինված ուժերին։
Այս դեպքում համապատասխան գերատեսչությունը ԲՏԱ նախարարությունն է, որի կազմի մեջ է մտնում ռազմարդյունաբերական կոմիտեն։ Նախարարի խոսնակ Լուսինե Մովսիսյանը Factor TV-ին հայտնեց, որ նախկինում ընկերության հետ պայմանագրերից մեկը խզվել է՝ որոշակի պարտավորություններ չկատարելու պատճառով։
«1 ամիս առաջ իրենց առաջարկվել է սերիական արտադրության պատվեր, եթե իրենք կկարողանան բավարարել առաջադրված խնդիրները: Տեղեկացնեմ նաև, որ բացի այդ՝ այժմ նշյալ ընկերությունը ՀՀ բարձր տեխնոլոգիական արդյունաբերության նախարարության հետ այլ գործող պայմանագիր ունի և իրենց հետ համագործակցությունը շարունակվում է»,- ասաց Լուսինե Մովսիսյանը:
Այս հարցով կրկին դիմեցինք նախագծող ընկերությանը։ Վահան Իսաջանյանը խզված պայմանագրի մասին ասաց, որ պատճառը եղել է համաճարակը․ չեն կարողացել տեղավորվել նախանշված ժամկետում, քանի որ սահմանների փակման հետևանքով հնարավոր չի եղել ներկրել անհրաժեշտ բաղադրիչները, ինչի մասին ընկերությունը հայտնել է նախարարությանը։ Ինչ վերաբերում է հետագա համագործակցությանը, Իսաջանյանն ասաց՝ պատրաստ են շարունակել աշխատանքը և ցանկացած քանակով պատվեր ապահովել՝ նաև հաշվի առնելով նախարարության առաջարկները։
Մանրամասները՝ տեսանյութում։
Գարիկ Հարությունյան
