Թուրքիայում երկու հետաքննող լրագրող է ձերբակալվել

Թուրքիայում երկու հայտնի լրագրողներ՝ Թիմուր Սոյքանը և Մուրատ Աղիրելը, ձերբակալվել են Ստամբուլում իրենց տներում առավոտյան կատարված խուզարկությունների ժամանակ՝ «սպառնալիքի և շանտաժի» մեղադրանքներով հետաքննության շրջանակում։ Երկու լրագրողներն էլ հայտնի են կոռուպցիայի և այլ անօրինական գործունեության վերաբերյալ իրենց հետաքննություններով և տարիներ շարունակ միասին աշխատել են հեռուստատեսային ծրագրում։

Լրագրողներն աշխատում են ընդդիմադիր Birgun և Cumhuriyet լրատվամիջոցներում, որոնք դատապարտել են նրանց ձերբակալումը և նշել, որ նրանց բերման են ենթարկել Ստամբուլի ընդդիմադիր քաղաքապետ Էքրեմ Իմամօղլուի կալանավորման վերաբերյալ հետաքննության պատճառով։

Ստամբուլի Գլխավոր դատախազությունը հայտարարության մեջ նշել է, որ լրագրողների ձերբակալումը կապված է հեռուստաալիքի գնման վերաբերյալ բողոքի հետ։ Վերջերս Flash TV-ն գնած և ներկայում փողերի լվացման մեղադրանքով կալանքի տակ գտնվող անձինք հայց են ներկայացրել լրագրողների դեմ, ինչի հիման վրա Դատախազությունը հետաքննություն է սկսել Թուրքիայի քրեական օրենսգրքի 106/1 (Սպառնալիք) և 107/1 (Շանտաժ) հոդվածներով։

Նոյեմբերին ընդդիմադիր Halk TV հեռարձակողի սեփականատեր Ջաֆեր Մահիրօղլուն հայտարարել էր, որ ձեռք է բերել Flash TV-ն և դրա կայքը։ Սակայն դեկտեմբերի 31-ի հետագա հայտարարության մեջ պարզաբանվել է, որ փոխանցումը վերջնականապես չի ավարտվել, և որ հեռուստաալիքը գնել է Pozitifbank-ի սեփականատեր Էրհան Քորքը։

Սոյքանը և Աղիրելը, երեք այլ լրագրողների հետ միասին, տարիներ շարունակ հաղորդում էին վարում Halk TV-ում: Նրանք վերջերս լքել են Halk TV-ն և բացել Onlar TV յութուբյան ալիքը:

Birgun-ի խորհրդի նախագահ Իբրահիմ Այդընը նշել է, որ իշխանությունները փորձում են լռեցնել մամուլին։

«Կառավարության թիրախը հանցագործությունն ու հանցագործները չեն, այլ իրական լրագրողները, որոնք պայքարում են ճշմարտությունը տարածելու համար»,- գրել է նա X-ի իր միկրոբլոգում։

Թարգմանությունը՝ Էմմա Չոբանյանի