Ֆրանսիան ծրագրում է ճանաչել Պաղեստին պետությունը մի քանի ամսվա ընթացքում և կարող է այդ քայլը կատարել հունիսին Նյու Յորքում իսրայելա-պաղեստինյան հակամարտության կարգավորմանը նվիրված ՄԱԿ-ի համաժողովում։ Այս մասին հայտարարել է Ֆրանսիայի նախագահ Էմանուել Մակրոնը, գրում է France 24-ը։
«Մենք պետք է շարժվենք դեպի ճանաչում, և մենք դա կանենք առաջիկա ամիսներին։ Մեր նպատակն է հունիսին նախագահել այդ համաժողովը Սաուդյան Արաբիայի հետ, որտեղ մենք կարող ենք ավարտին հասցնել [Պաղեստին պետության] փոխադարձ ճանաչման այս շարժումը մի քանի կողմերի կողմից։ Ես դա կանեմ, քանի որ հավատում եմ, որ մի պահ դա ճիշտ կլինի, և քանի որ ես նաև ցանկանում եմ մասնակցել մի կոլեկտիվ դինամիկայի, որը պետք է թույլ տա նաև Պաղեստինը պաշտպանողներին ճանաչել Իսրայելը, ինչը նրանցից շատերը չեն անում»,- France 5 հեռուստաընկերությանը ասել է Մակրոնը։
Նա հավելել է, որ նման ճանաչումը թույլ կտա Ֆրանսիային «հստակ լինել նրանց դեմ պայքարում, որոնք մերժում են Իսրայելի գոյության իրավունքը, ինչը տեղի է ունենում Իրանի դեպքում, և հանձնառու լինել տարածաշրջանում կոլեկտիվ անվտանգությանը»։
Մակրոնի մեկնաբանությունները ողջունել են Պաղեստինի ինքնավարությունում։
«Ֆրանսիայի կողմից Պաղեստինի պետականության ճանաչումը կլինի ճիշտ ուղղությամբ արված քայլ՝ համաձայն պաղեստինցի ժողովրդի իրավունքների պաշտպանության և երկու պետությունների լուծման»,- AFP-ին ասել է Պաղեստինի արտաքին գործերի պետական նախարար Վարսեն Աղաբեկյան Շահինը։
Թարգմանությունը՝ Էմմա Չոբանյանի
