29.06.2026 | 14:16
«Դադարեցրե՛ք դա»․ Օրբելյանի և Սեդա Սաֆարյանի վեճից հետո փաստաբանին նկատողություն հայտարարվեց․ ՏԵՍԱՆՅՈՒԹ
Եվրոպայի խորհուրդը իրավախախտման գործընթաց է սկսել Թուրքիայի դեմ
Քաղաքականություն
03.12.2021 | 13:45
Եվրոպայի խորհրդի նախարարների կոմիտեն երեք օրվա քննարկումների արդյունքում որոշել է վարույթ սկսել Թուրքիայի դեմ՝ գործարար Օսման Քավալային անմիջապես ազատ արձակելու պահանջով մարդու իրավունքների խախտման վճիռը և ՄԻԵԴ-ի որոշումը չկատարելու համար, գրում է Bianet-ը։
Նշվում է, որ իրավախախտման վարույթ սկսելու գործընթացը քվեարկվել է Եվրախորհրդի Նախարարների կոմիտեի նիստում, որը պատասխանատու է ՄԻԵԴ վճիռների կատարման վերահսկման համար։ Գործընթաց սկսելու համար անհրաժեշտ է ձայների երկու երրորդը, իսկ որոշմանը կողմ է քվեարկել ԵԽ 47 անդամից 32-ը։
Հաղորդվում է, որ պաշտոնական հայտարարությունն այսօր հրապարակվելու է ավելի ուշ։
Նախարարների կոմիտեն փետրվարի 2-ի նիստում կրկին կքննարկի Քավալայի գործը: Եթե Օսման Քավալան, ՄԻԵԴ վճռի համաձայն, ազատ արձակվի մինչև հանդիպումը, իրավախախտման վերաբերյալ վարույթը կարող է չսկսվել:
Նշենք, որ բարերար, իրավապաշտպան Օսման Քավալան կալանավորվել է 2017 թվականին Ստամբուլի Գեզի այգու ցույցերը կազմակերպելու մեղադրանքով։ Թուրքական դատարանը նրան արդարացրեց 2020 թվականի փետրվարին, սակայն 2016-ին ռազմական հեղաշրջման փորձի գործով, լրտեսության և սահմանադրական կարգը խախտելու համար, Քավալան կրկին ձերբակալվեց։ Նա աշխարհի տարբեր իրավապաշտպան կազմակերպությունների կողմից համարվում է քաղբանտարկյալ, ինքը՝ Քավալան իրեն առաջադրված մեղադրանքները չի ընդունում՝ դրանք քաղաքական որակելով։
Հավելենք, որ անցյալ ամիս էլ Թուրքիայում արևմտյան 10 երկրների դեսպաններ հայտարարություն էին տարածել՝ Քավալային ազատ արձակելու կոչով։
Էմմա Չոբանյան
