11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
Իշխանության յուրացման փորձ կատարելու մեջ մեղադրվող Արշակ Զաքարյանի և մյուսների գործը դատարանում է
Հասարակություն
02.12.2021 | 13:59
Իշխանության յուրացման փորձ կատարելու համար մեղադրյալի աթոռին հայտնված Արշակ Զաքարյանի, Վահագն Չախալյանի, Տիգրանի Չոբանյանի, Արագած Ախոյանի և Իսրայել Հակոբկոխյանի գործը դատարանում է։ Factor.am-ը «Դատալեքս» դատական տեղեկատվական համակարգից տեղեկացավ, որ քրեական գործը վարույթ է ընդունվել նոյեմբերի 30-ին և մակագրվել Երևան քաղաքի ընդհանուր իրավասության դատարանի Կենտրոնի նստավայրի դատավոր Մեսրոպ Մակյանին։
Ըստ առաջադրված մեղադրանքի՝ նրանք փորձել են իշխանությունը զավթել՝ բռնություն գործադրելու և բռնություն գործադրելու սպառնալիքի միջոցով, ինչպես նաև ՀՀ Սահմանադրությամբ չնախատեսված այլ եղանակով տիրանալ ՀՀ կառավարության լիազորություններին, սակայն հանցանքն ավարտին չեն հասցրել՝ իրենց կամքից անկախ հանգամանքներով։
Հիշեցնենք՝ հունվարի 28-ին քաղաքացիները Հանրապետության հրապարակում բողոքի ակցիա էին իրականացրել՝ վարչապետ Նիկոլ Փաշինյանի հրաժարականի պահանջով։ Կառավարության շենքի մոտ, որտեղ բախումներ են տեղի ունեցել ոստիկանության ու քաղաքացիների միջև, մի խումբ անձինք փորձել են մուտք գործել շենք, ինչի արդյունքում 21 անձ բերման էր ենթարկվել, որոնցից հինգ հոգին՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը, ձերբակալվել էին։ Դատարանի կողմից, սակայն, նրանց ձերբակալումը ոչ իրավաչափ էր ճանաչվել։
Այդուհանդերձ, նրանց մեղադրանք էր առաջադրվել ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով և նրանց նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որոնք մերժվել են՝ հիմնավոր կասկածի բացակայության հիմքով։
Այս պահին նրանց նկատմամբ կիրառված է խափանման միջոց ստորագրություն՝ չհեռանալու մասին։
Ռոզա Վարդանյան
