19.11.2024 | 20:12
Ռազմական սպորտի միջազգային խորհրդի ղեկավար կազմը այցելել է Հայոց ցեղասպանության զոհերի հուշահամալիր
Բաքվում ոստիկանությունը ուժով ցրել է ընդդիմադիրների ցույցը․ կան ձերբակալվածներ․ ԼՈՒՍԱՆԿԱՐՆԵՐ
Քաղաքականություն
01.12.2021 | 18:02
Բաքվում ոստիկանությունը բռնություն է կիրառել և ցրել Շատրվանների հրապարակում անցկացվող խաղաղ ակցիան՝ Գեդաբեկի շրջանի նախկին ղեկավար Սալեհ Ռուստամովին ազատ արձակելու պահանջով, որն արդեն 26 օր է՝ հացադուլ է իրականացնում, գրում է «Թուրան»-ը։
Դեռ ակցիայի մեկնարկից առաջ, որը նախատեսված էր ժամը 15։00-ին, ձերբակալվել են կազմակերպիչները՝ երիտասարդ ակտիվիստներ Իլկին Ռուստամզադեն և Մեթե Թյուրքսոյը։ Ժամը 15։00-ի սահմաններում ոստիկանությունը սկսել է ձերբակալել բոլոր նրանց, որոնք հնչեցրել են «Ազատություն Սալեհին», «Մի՛ սպանեք Սալեհին» և այլ կարգախոսներ։ Ձերբակալվել են նաև ակցիայի կին մասնակիցները։ Մի տարեց կնոջ, որը հարցազրույց է տվել լրագրողներին, ոստիկանները բռնել ու մտցրել են ոստիկանական մեքենան։
Սոցիալական ցանցերի ադրբեջանական տիրույթում ակտիվորեն տարածվում են բողոքի ակցիայի մասնակիցների ձերբակալման ու ոստիկանների բռնության գործադրման կադրերը։
Նշվում է, որ 20-25 մարդ է ձերբակալվել, որոնց թվում են նաև Ժողովրդավարական ուժերի ազգային խորհրդի անդամ Թոֆիգ Յագուբլուն, նրա դուստրը՝ Նիգյար Խազին, ակտիվիստուհի Դիլարա Միրիևան և ուրիշներ։
Ակցիայից առաջ կազմակերպիչները հետևյալ հայտարարությունն էին տարածել․ «Մենք գտնում ենք, որ Սալեհի ձերբակալությունն իրականացվել է քաղաքական պատվերի ու քաղաքական կողմնակալության հիմքով։ Կառավարությունը ոչ մի դեպքում չպետք է հակասահմանադրական կերպով օգտագործի ուժային կառույցների իշխանությունն իր ընդդիմախոսների նկատմամբ»։
Նշվում է, որ Ռուստամովը գտնվում է ծայրահեղ ծանր վիճակում։
«Եթե նրան այսօր ազատ չարձակեն, վաղն արդեն ուշ կլինի»,- ասվում է հայտարարությունում։
Ադրբեջանի ընդդիմադիր Ազգային ճակատ կուսակցության աջակից, Արցախյան առաջին պատերազմի մասնակից Սալեհ Ռուստամովը ձերբակալվել է 2018 թվականի մայիսին և 7 տարի 3 ամիս ժամկետով ազատազրկման դատապարտվել, այսպես կոչված, «Ժողովրդական ճակատ կուսակցության ապօրինի ֆինանսավորման» գործով։ Իրավապաշտպանները նրան քաղբանտարկյալ են ճանաչել։ Այնուհետև Գերագույն դատարանը 2 ամսով կրճատել է պատիժը։ Նոյեմբերի 6-ից էլ նա անժամկետ հացադուլ է հայտարարել՝ իրեն ազատ արձակելու պահանջով։
Էմմա Չոբանյան
