Էրդողանի կոալիցիոն գործընկեր Դևլեթ Բահչելին սպառնում է Անկարայի ընդդիմադիր քաղաքապետին

Թուրքիայի նախագահ Ռեջեփ Թայիփ Էրդողանի կոալիցիոն գործընկեր, «Ազգայնական շարժում» կուսակցության առաջնորդ Դևլեթ Բահչելին սպառնացել է Անկարայի ընդդիմադիր քաղաքապետ Մանսուր Յավաշին՝ նրան մեղադրելով նախորդ շաբաթ իր կուսակիցների վրա հարձակման մեջ, գրում է «Duvar»-ը։

Խորհրդարանական խմբակցության հետ հանդիպումից հետո լրագրողների հետ զրույցում Բահչելին, մասնավորապես, ասել է․ «Պարոն Մանսուրը պետք է զգույշ լինի։ «Գորշ գայլերի» շունչը այժմ նրա մեջքին է»։

Բահչելին նման հայտարարություն է արել այն բանից հետո, երբ MHP-ի կողմնակիցները հանգստյան օրերին հարձակվել են Անկարայում կուսակցության հիմնադրի հիշատակի արարողության մասնակիցների վրա։ «Գորշ գայլերի» մոտ 50 անդամներից բաղկացած խումբը նոյեմբերի 28-ին ներխուժել էր Ալփարսլան Թյուրքեշի հիշատակին նվիրված միջոցառման վայր։ Արդյունքում մի քանի մարդ էր վիրավորվել։

Ըստ Բահչելիի՝ Յավաշը, որը գլխավոր ընդդիմադիր Ժողովրդահանրապետական (CHP) կուսակցությունից է, պատասանատու է ծեծկռտուքի համար։ CHP-ն արագորեն արձագանքել է Բահչելիին սպառնալիքներին՝ նշելով, որ Յավաշը Անկարայի բնակիչների աջակցությունն է վայելում։

«Անկարայի բնակիչների և Ժողովուրդների դաշինքի շունչը Յավաշի մեջքին է։ Այդ սպառնալիքները ոչ մեկին օգուտ չեն տվել ու երբեք չեն տա»,- ասել է կուսակցության փոխնախագահ Սեյիթ Թորունը։

Նշենք, որ 2019 թվականի մարտին Յավաշը դարձավ CHP-ից Անկարայի առաջին քաղաքապետը՝ Էրդողանի «Արդարություն և զարգացում» կուսակցության ու նրա իսլամիստ նախորդի 25 տարվա կառավարումից հետո։

Էմմա Չոբանյան