28.03.2026 | 10:14
ՀՀ տարածքում ավտոճանապարհները հիմնականում անցանելի են
ՎԶԵԲ-ը և E5P հիմնադրամը կֆինանսավորեն Երևանի «կանաչ» ավտոբուսների ծրագիրը
Տնտեսություն
24.11.2021 | 13:21
Վերակառուցման և զարգացման եվրոպական բանկը (ՎԶԵԲ) Հայաստանին տրամադրում է 20 միլիոն եվրո գումարի չափով սուվերեն վարկ՝ «ԵՐԵՎԱՆԻ ԱՎՏՈԲՈՒՍ» ընկերությանը հնարավորություն ընձեռելով գնել սեղմված բնական գազով շահագործվող նոր ավտոբուս։ Այդ տրանսպորտային միջոցների շնորհիվ կբարելավվեն ավտոբուսային ծառայությունները Հայաստանի մայրաքաղաքի 1 միլիոն բնակչի համար՝ բարձրացնելով հասարակական տրանսպորտի հուսալիությունը, անվտանգությունը և արդյունավետությունը՝ միաժամանակ նվազեցնելով շրջակա միջավայրի աղտոտումը արտանետումների կրճատման շնորհիվ․ տեղեկացնում են ՎԶԵԲ-ի լրատվական ծառայությունից։
ՎԶԵԲ-ի վարկին աջակցում է 5 միլիոն եվրո գումարի չափով կապիտալ դրամաշնորհը Արևելյան Եվրոպայի էներգախնայողություն և շրջակա միջավայրի գործընկերություն (E5P) հիմնադրամի կողմից, որը ՎԶԵԲ-ի կողմից կառավարվող՝ բազմադոնոր հիմնադրամ է: Եվրամիությունը E5P հիմնադրամի ամենախոշոր ներդրողն է, իսկ Շվեդիան՝ ամենախոշոր երկկողմանի դոնորն ու հիմնադրամի նախաձեռնողը: Հայաստանում E5P հիմնադրամի մյուս դոնորներից են Չեխիան, Դանիան, Ֆինլանդիան, Գերմանիան, Լիտվան, Նորվեգիան, Լեհաստանը, Սլովակիայի Հանրապետությունը և ՎԶԵԲ-Թայվան գործարար տեխնիկական համագործակցության հիմնադրամը:
Ծրագիրը նպատակ ունի բարելավել Երևանում հասարակական տրանսպորտի շարժունակությունը և ՎԶԵԲ-ի՝ Կանաչ Քաղաքների շրջանակի մի մասն է կազմում՝ աջակցելով «կանաչ» համայնքային ներդրումներին այն երկրներում, որտեղ ՎԶԵԲ-ը ներդրումներ է կատարում: Նոր ցածրահատակ ավտոբուսները հարմարեցված են շարժման սահմանափակ կարողություններ ունեցող ուղևորների, այդ թվում՝ տարեցների և հաշմանդամություն ունեցող անձանց համար։
«ԵՐԵՎԱՆԻ ԱՎՏՈԲՈՒՍ» ընկերությունը ՎԶԵԲ-ից նաև կստանա տեխնիկական աջակցություն կորպորատիվ զարգացման, տոմսերի նոր համակարգի ներդրման և շահագրգիռ կողմերի ներգրավման համար (հաշվի առնելով ուղևորների տարբեր կարիքներն ու կարողությունները), ինչպես նաև կստանա խորհրդատվական ծառայություններ, որոնք ուղղված են գենդերային հավասարության ու ներառականության ապահովմանը՝ խթանելով անվտանգությունը բոլորի համար և մասնավորապես՝ կանանց համար:
Հայաստանում ՎԶԵԲ-ի ղեկավար Դիմիտրի Գվինդաձեն ասել է․ «Սա ևս մեկ քայլ է Երևան քաղաքի հետ մեր ներգրավվածությունն ամրապնդելու ուղղությամբ: Մենք վստահ ենք, որ նոր ավտոբուսները լավ կընդունվեն հանրության կողմից և կնպաստեն բնապահպանական և անվտանգության չափանիշների բարելավմանը: Սա կբարձրացնի պահանջարկը և կնպաստի հասարակական տրանսպորտի ընդլայնմանը: Մեզ համար առաջնահերթ է բարելավել Հայաստանի քաղաքացիների կյանքը, ինչպես նաև ավելի «կանաչ» դարձնել շրջակա միջավայրը»։
Հայաստանում ԵՄ պատվիրակության ղեկավար, դեսպան Անդրեա Վիկտորինը ասել է. «ԵՄ-ն ուրախ է ներդրումներ կատարել «խելացի» շարժունակության և կայուն քաղաքային տրանսպորտի ոլորտում՝ Երևանի համար նոր «կանաչ» ավտոբուսների նախաձեռնության միջոցով՝ օգնելու բարելավել և արդիականացնել մայրաքաղաքում ավտոբուսների աշխատանքը: Այս առաջատար նախաձեռնությունը հստակ ուղիներ է ստեղծում «կանաչ» ներդրումների համար, որոնք կիրականացվեն կլիմայի հետ կապված մեր ընդհանուր թիրախներին հասնելու նպատակով: Նախաձեռնությունը ոչ միայն կօգնի փոխակերպել տրանսպորտը և ավելի շատ հոգ տանել շրջակա միջավայրի մասին, այլև շարժման սահմանափակ կարողություններ ունեցող ուղևորներին անվտանգ, հուսալի և մատչելի փոխադրումներ կտրամադրի»:
ԵՄ «Կանաչ գործարք» և Team Europe ՔՈՎԻԴ-19 համավարակի արձագանքման նախաձեռնությունները պարզ են դարձնում, որ բնապահպանական և կլիմայական մարտահրավերները հրատապ գործողություններ են պահանջում ԵՄ-ից, նրան անդամակցող պետություններից և գործընկեր երկրներից։ ԵՄ-ն և Հայաստանը փոխկապակցման և «կանաչ» տնտեսական փոխակերպման ոլորտում ֆինանսական աջակցության և փոխառու միջոցների օգտագործմամբ ներդրումների գործում արդեն զգալի հաջողություններ ունեն: E5P բազմադոնոր հիմնադրամը շարունակաբար խրախուսում է Հայաստանում նման ներդրումները: Երևանի ՍԲԳ ավտոբուսների ծրագրի՝ ՎԶԵԲ-E5P ֆինանսավորման համաձայնագրի ստորագրումը միջազգային, ազգային և տեղական մակարդակներով իրականացվող գործողությունների ապացույց է։
ՎԶԵԲ-ը Հայաստանում առաջատար ինստիտուցիոնալ ներդրողն է։ Երկրում իր գործունեության մեկնարից ի վեր Բանկը ավելի քան 1.67 մլրդ եվրո է ներդրել 195 ծրագրերում՝ ֆինանսական, կորպորատիվ, ենթակառուցվածքային և էներգետիկ ոլորտներում, ընդ որում ներդրումների 91 տոկոսն արվել է մասնավոր հատվածում։
