31.12.2025 | 23:53
Վերահաստատենք եղբայրասիրության, փոխադարձ հարգանքի մթնոլորտը մեր հայրենիքում. Գարեգին Բ
ՀՀ-ում և ԱՊՀ մյուս երկրներում ցանցային համալսարան կհիմնադրվի
Հասարակություն
18.11.2021 | 23:28
Ազգային ժողովը նոյեմբերի 17-ին միաձայն հավանության է արժանացրել ««Անկախ պետությունների համագործակցության ցանցային համալսարանի հիմնադրման և գործունեության մասին» համաձայնագիրը վավերացնելու մասին» օրենքի նախագիծը, որով մասնակից երկրները կհիմնադրեն ԱՊՀ ցանցային համալսարան:
Նախագիծն Ազգային ժողովում Կառավարության կողմից ներկայացրել է ԿԳՄՍ նախարարի տեղակալ Արթուր Մարտիրոսյանը, տեղեկացնում են նախարարությունից։
2020 թվականին Տաշքենդում համաձայնագիրը ստորագրվել է Հայաստանի Հանրապետության, Ռուսաստանի Դաշնության, Ղազախստանի Հանրապետության, Ղրղզստանի Հանրապետության, Տաջիկստանի Հանրապետության, Բելառուսի Հանրապետության և Ուզբեկստանի Հանրապետության կառավարությունների միջև, և համաձայնագրի՝ ուժի մեջ մտնելու համար նախատեսված ընթացակարգերն արդեն իսկ կատարվել են Ռուսաստանի, Բելառուսի և Տաջիկստանի կողմից: Համաձայնագրով կողմերը հիմնադրում են ԱՊՀ ցանցային համալսարան` բարձրագույն կրթության, լրացուցիչ մասնագիտական կրթական ծրագրերի մասնագիտությունների կադրերի պատրաստման, համատեղ կրթագիտական և գիտատեխնիկական նախագծերի իրագործման համար, որոնք առաջնահերթ նշանակություն ունեն համաձայնագրի մասնակից պետությունների տնտեսական և սոցիալական զարգացման գործում:
Նախարարի տեղակալը ներկայացրել է գործընթացի նախապատմությունը՝ տեղեկացնելով, որ ԱՊՀ ցանցային համալսարանը ստեղծվել է դեռ 2009 թվականին համագործակցության երկրների 11 առաջատար համալսարանների միջև ստորագրված Կոնսորցիումի մասին համաձայնագրով, որը ենթադրում է այդ բուհերի իրավահավասար գործընկերություն: Հայաստանի Հանրապետությունից կոնսորցիումի անդամ բուհ են հանդիսացել Երևանի պետական համալսարանը, Բրյուսովի անվան պետական համալսարանը և Հայաստանի ազգային պոլիտեխնիկական համալսարանը, որոնք 2010-2020 թվականների ընթացքում պատրաստել են շուրջ 120 մասնագետներ։
Փոխնախարարի խոսքով՝ այս համաձայնագրով առավել ամրապնդվում են վերոնշյալ իրավական հիմքերը, և այն հնարավորություն է տալիս ամբողջացնելու գործընթացը՝ ԱՊՀ շրջանակում ցանցային համալսարանական գործունեություն ծավալելու նպատակով: ԱՊՀ տարածաշրջանում միջբուհական համագործակցության զարգացման հնարավորությունների ընդլայնումը էականորեն կնպաստի հայաստանյան բուհերի միջազգայնացմանը՝ եվրոպական տարածաշրջանում Եվրոպական միության աջակցությամբ իրականացվող Էրազմուս+ ծրագրի շրջանակում փորձառության որոշակի համանմանությամբ:
Նշենք, որ ՀՀ-ն, փոխադարձության հիման վրա, համաձայնագրով պարտավորվում է ապահովել ԱՊՀ ցանցային համալսարանի կողմից տրամադրվող կրթական ծառայություններին համաձայնագրի մասնակից պետությունների քաղաքացիների հավասար հասանելիություն՝ անկախ ազգությունից, սեռից, տարիքից, դավանանքից, ռասայից, լեզվից, ծագումից, բնակության վայրից, առողջական վիճակից, սոցիալական և գույքային դրությունից: ՀՀ-ն պարտավորվում է գործընկեր կազմակերպություններում ուսուցման համար համաձայնագրի մասնակից պետությունների քաղաքացիների ընդունելությունը և ՀՀ-ում նրանց ուսուցումը կատարել համաձայնագրին, ՀՀ օրենսդրությանը և գործընկեր կազմակերպությունների միջև այն պայմանագրին համապատասխան, որում նշվում են համատեղ կրթական ծրագրի տեսակը, մակարդակը, ուղղվածությունը և այլն:
Համաձայնագրի մասնակից պետությունների քաղաքացիների ուսուցումը գործընկեր կազմակերպությունների միջև կնքված պայմանագրի շրջանակում կիրականացվի ՀՀ բյուջեով նախատեսված հատկացումների հաշվին՝ նշված անձանց վճարելով կրթաթոշակներ և գործընկեր կազմակերպությունների հանրակացարաններում նրանց տրամադրելով բնակելի տարածքներ կամ ֆիզիկական և իրավաբանական անձանց միջոցների հաշվին՝ վճարովի կրթական ծառայություններ մատուցելու մասին պայմանագրին համապատասխան, ֆինանսավորման այլ աղբյուրներից ստացվող միջոցների հաշվին, որոնց գործունեությունը չի հակասում ՀՀ օրենսդրությանը:
ՀՀ-ն պարտավորվում է ապահովել, որ ՀՀ օրենսդրությանը և գործընկեր կազմակերպությունների միջև կնքված պայմանագրին համապատասխան՝ ԱՊՀ ցանցային համալսարանի շրջանավարտները ստանան կրթության մասին և ՀՀ այն գործընկեր կազմակերպությունների կողմից տրված որակավորման մասին վկայող փաստաթղթեր, որոնցում ԱՊՀ ցանցային համալսարանի շրջանավարտներն անցել են ուսուցումը:
