ԵՐԵՎԱՆԻ ԺԱՄԱՆԱԿՈՎ. Մեր պարտությունը քաղաքականության մեջ գավառական առճակատումների արդյունք էր. Հակոբ Ղազանչյան.ՏԵՍԱՆՅՈՒԹ

«Այսօր հավատ է պետք` հուսահատությունից դուրս գալու համար, հավատ` վաղվա օրվա նկատմամբ: Ցավոք, պատերազմը զրոյացրեց 30 տարվա պատմությունը, մտավորականին հիասթափության այնպիսի աստիճանի բերեց, որ չգիտեմ` ինչ է լինելու այս վիճակից դուրս գալու համար: Մեր պարտությունը քաղաքականության մեջ գավառական առճակատումների արդյունք էր: Դժվարին ժամանակներ են, բայց պետք է ինքնասպանության չգնանք, այլ հուսանք, որ լույս կվառվի»,- Factor.am-ի հետ զրույցում նման տեսակետ է հայտնում Հ.Պարոնյանի անվան երաժշտական կոմեդիայի պետական թատրոնի գեղարվեստական ղեկավար և գլխավոր ռեժիսոր, Հայաստանի թատերական գործիչների միության նախագահ Հակոբ Ղազանչյանը:

Նա անդրադառնում է նաև ԿԳՄՍ նախարարության գործելաոճին, ներկա և նախկին նախարարներին.

«ԿԳՄՍ նախարարի հետ դեռ չեմ հանդիպել, բայց լավ տպավորություն է թողել ինձ վրա: Կուզենայի, որ երբեմն նախարարն անձամբ զբաղվեր թատրոններով, ամեն բան տեղակալներին չթողներ»:

Թատրոնի գեղղեկավարի կարծիքով` առհասարակ, նոր նշանակված նախարարների շրջանում մի միտում կա` իրենց տեսակետները համարում են իդեալական և վերջնական.

«Ամեն նախարար պետք է գիտենա, որ նախարար լինելը կաթողիկոս լինել չէ, ցմահ չէ: Բացի այդ` պաշտոնյան պետք է չջղաձգվի որևէ մեկի ելույթից, իրեն ուղղված խոսքից, առավել ևս, որ մեզ փորձում են համոզել, թե դեմոկրատական երկրում ենք ապրում: Ի դեպ, իշխանության բարձր էշելոններում ավելի հանդուրժող են քննադատության նկատմամբ, քան միջին օղակներում. կարիերիստների մի տեսակ կա, իրենց հետ դժվար է»:

Հարցին, թե թատրոնում` հանդիսատեսի շրջանում, արդյոք հաճախ է տեսնում պաշտոնյաների, Հակոբ Ղազանչյանը պատասխանում է.

«Նախկին նախարարներն ավելի շատ էին լինում պրեմիերաներին, քան` ներկայիս: Իսկ, առհասարակ, պաշտոնյաների հանդիսատեսի շրջանում հաճախ չեմ տեսնում»:

Մանրամասները`տեսանյութում:

Աննա Բաբաջանյան