Քաղաքականություն
12.11.2021 | 17:52
Թուրքիայում իսրայելցի ամուսիններ են ձերբակալվել նախագահ Ռեջեփ Թայիփ Էրդողանի տունը լուսանկարելու համար։ Նրանք տեղափոխվել են Ստամբուլի ոստիկանության բաժանմունք՝ ահաբեկչության դեմ պայքարի վարչություն, հաղորդում է իսրայելական i24news.tv-ն։
Նրանք ձերբակալվել են այն բանից հետո, երբ կինը նկարահանել է Էրդողանի տունը՝ չիմանալով, որ դա անօրինական է։ Նա լուսանկարն ուղարկել է WhatsApp-ի ընտանեկան խմբին՝ «Ինչ գեղեցիկ տուն է» գրությամբ։
«Դա անմեղ արարք է, հանցագործություն չէ, այլ զբոսաշրջային գործողություն»,- ասել է զույգի փաստաբան Նիր Յազլովիչը Իսրայելի ԱԳ նախարար Յաիր Լապիդին ուղղված նամակում։
Նա նշել է, որ ամուսինները լրտեսներ չեն, այլ ուղղակի ճանապարհորդել են զբոսաշրջային վայրերով։
Իսրայելի ԱԳՆ-ից էլ հայտնել են, որ ծանոթ են իրավիճակին ու զբաղվում են խնդրով։
«Մենք գիտեինք, որ նրանք վերադառնալու են երեքշաբթի և հանկարծակի անհետացան։ Մենք շատ անհանգստացած ենք»,- ասել է ձերբակալված կնոջ քույրը՝ հավելել է, որ իր քույրը որևէ լրտեսական գործակալական ցանցի հետ կապված չէ։
Թուրքական աղբյուրների համաձայն էլ՝ ամուսինները Ստամբուլի Չամլըջայի աշտարակի պատուհանից քաղաքի տեսարժան վայրերը նկարահանելիս նկատել են նաև նախագահ Էրդողանի տունը, ինչի մասին խոսել են միմյանց հետ։ Աշտարակի ծառայակիցներից մեկը լսել է նրանց զրույցը և այդ մասին տեղեկացրել ոստիկանությանը։
Էմմա Չոբանյան
