19.05.2026 | 23:24
Արփինե Սարգսյանը և ԱՄՆ ժամանակավոր հավատարմատարը քննարկել են կիբեռլաբորատորիայի ստեղծումն ու համագործակցության ընդլայնումը
Զաքիր Հասանովը խոսել է Արցախյան 44-օրյա պատերազմում թուրք գեներալների դերի մասին
Քաղաքականություն
09.11.2021 | 15:24
Ադրբեջանի պաշտպանության նախարար Զաքիր Հասանովը իր թուրք գործընկեր Հուլուսի Աքարի հետ Բաքվում համատեղ մամուլի ասուլիսում մի շարք հայտարարություններով է հանդես եկել։ Ադրբեջանական լրատվամիջոցների փոխանցմամբ՝ Հասանովն Աքարին և Թուրքիային շնորհակալություն է հայտնել Արցախյան 44-օրյա պատերազմում ցուցաբերած աջակցության համար։
Նա նաև խոսել է պատերազմում թուրք զինվորականների վճռորոշ դերակատարման մասին։
«44 օրերի ընթացքում Թուրքիայի ռազմաքաղաքական ղեկավարությունը միշտ Ադրբեջանի կողքին էր, ցուցաբերում էր քաղաքական ու բարոյական աջակցություն։ Ադրբեջանական բանակի անձնակազմի պատրաստվածությունն իրականացվել է Թուրքիայի ԶՈՒ ուսումնամարզական կենտրոններում։ Բոլորին հայտնի է, որ Թուրքիան ունի աշխարհում ամենաուժեղ բանակներից մեկը։ Մենք օգտագործեցինք Թուրքիայի ԶՈՒ-ի փորձը և շարունակում ենք դա անել հիմա»,- ասել է Հասանովը։
Նա նշել է, որ շարունակում են ադրբեջանական բանակը վերակազմակերպել թուրքական ԶՈՒ-ի մոդելով։
«Ես ինքս շատ բան եմ սովորում գեներալներից, որոնք այստեղ նստած են։ Պատերազմից հետո, նախագահի հրամանով վերլուծելով պատերազմի արդյունքները, մենք միջոցներ ենք ձեռնարկել ադրբեջանական բանակի վերակազմակերպման համար։ Ադրբեջանի նախագահի հանձնարարությամբ՝ ներկայում շարունակում ենք ադրբեջանական բանակի կազմակերպումը Թուրքիայի ԶՈՒ-ի մոդելին համապատասխան»,- ասել է Ադրբեջանի ՊՆ ղեկավարը։
Նա նաև հայտնել է, որ Ադրբեջանի բանակում մի քանի նոր օպերատիվ կառույցներ են ստեղծում։ Ըստ Հասանովի՝ օպերատիվ բրիգադների շատ զինծառայողներ Թուրքիայում ուսուցում են անցնում և Ադրբեջան վերադառնալուց հետո շարունակում են ծառայությունը ԶՈՒ ամենակարևոր միավորումներում։
Էմմա Չոբանյան
