Իմ խորհուրդն է հայերին՝ մտածեք, թե ինչպես կարող եք ԿԸՀ-ն դարձնել ավելի արժանահավատ և հանրային վստահությունը վայելող կառույց. Պ. Սվիտալսկի

ԵՄ-ն արտահայտել է իր նախնական տեսակետը Հայաստանում կայացած վերջին ընտրությունների վերաբերյալ, սակայն եվրոպական կառույցների վերջնական զեկույցին ենք սպասում, և դրանից հետո գուցեև լրացուցիչ կարծիքներ հրապարակենք. այս մասին ասել է Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ ԵԽ-ի կազմակերպած «Ընտրական զարգացումները Հայաստանում» թեմայով կայացած քննարկման ընթացքում:

«Ինձ թվում է՝ այստեղ գտնվողներից ոչ մեկը չի կարող ասել, որ վերջին ընտրությունները ՀՀ-ում եղան կատարյալ, որ Հայաստանը հասել է այն նպատակին, որին ձգտում է, այսինքն՝ ժողովրդավարական ստանդարտների կատարելությանը»,- ասել է նա:

Պյոտր Սվիտալսկին շեշտել է, որ Հայաստանում ուշադրության են արժանի ընտրատեղամասերից դուրս տեղի ունեցող գործընթացները: «ԵՄ նախնական զեկույցում նշվել է, որ եղել են ընտրություններն ուղղորդելու,  ընտրակաշառք բաժանելու, սպառնալիքներ հնչեցնելու դեպքեր:  Օրինակ՝ բուժհաստատություններից մեկում հիվանդների փոխարեն քվեարկել էին բժիշկները: Սրանք անընդունելի երևույթներ են, որոնք պետք է վերացվեն »,- նշել է նա:

Եմ պատվիրակության ղեկավարը շեշտել է, որ ՀՀ-ում կարևոր է հաստատությունների արժանահավատությունը: «ԿԸՀ-ի կազմում պետք է ներգրավվեն քաղհասարակության ներկայացուցիչներ: Իմ խորհուրդն է հայերին՝ մտածեք, ուսումնասիրեք ԿԸՀ-ի կազմի խնդիրը, նաև այն, թե ինչպես կարող եք ԿԸՀ-ն դարձնել ավելի արժանահավատ և հանրային վստահությունը վայելող կառույց»,- ասել է նա: