11.10.2026 | 14:46
Այսօր աղջիկ երեխաների միջազգային օրն է
Անկարան սպասում է «Զանգեզուրի միջանցքի» բացմանը․ Թուրքիայի ԱԺ նախագահ
Քաղաքականություն
05.11.2021 | 15:59
Թուրքիան կողմ է, որ Կովկասը վերածվի համագործակցության, համերաշխության ու զարգացման գոտու։ Այս մասին հայտարարել է Թուրքիայի Ազգային Մեծ ժողովի նախագահ Մուստաֆա Շենթոփը Անկարայում Արցախյան երկրորդ պատերազմում Ադրբեջանի հաղթանակին նվիրված լուսանկարչական ցուցահանդեսին, գրում է «Անադոլու» գործակալությունը։
Նա նշել է, որ «Ադրբեջանի հաղթանակով վերացվել է Կովկասում կայուն խաղաղության ու համագործակցության գլխավոր խոչընդոտը»։
«Կովկասում երկխոսության համար հիմք է ձևավորվել։ Երևանը հնարավորություն ունի կառուցողական մոտեցում ցուցաբերել։ Հայաստանը պետք է հարգի 2020թ․ նոյեմբերի 9-ի հրադադարի հայտարարության կետերը։ Պետք է ստորագրվի խաղաղության պայմանագիր»,- ասել է Շենթոփը։
Նա նաև խոսել է թուրք-ադրբեջանական քարոզչական թեզի՝ այսպես կոչված «Զանգեզուրի միջանցքի» մասին։ Շենթոփը կոչ է արել «բացել Հայաստանի վերահսկողության տակ գտնվող 46 կմ-ոց միջանցքը Արևմտյան Զանգեզուրում», որն «իր ներդրումը կունենա համաշխարհային առևտրի գործում»։
«Մենք Երևանից համարձակ ու կառուցողական քայլեր ենք սպասում ՝հենց Հայաստանի ապագայի առաջնահերթությունները հաշվի առնելով»,- ասել է Շենթոփը։
Նշենք, որ Հայաստանը որևէ միջազգային փաստաթուղթ չի ստորագրել ՀՀ սուվերեն տարածքով երրորդ երկրի միջանցք տրամադրելու մասին։ Նոյեմբերի 9-ի եռակողմ հայտարարության մեջ խոսք է գնում ընդամենը մեկ՝ Լաչինի միջանցքի մասին։
Էմմա Չոբանյան
