ԵՐԵՎԱՆԻ ԺԱՄԱՆԱԿՈՎ. Հայաստանում թանգարանների մասնաճյուղերը կարծես որբի կարգավիճակում լինեն, ֆինանսապես անկախ չեն. Աննա Սարգսյան

«Հայաստանում թանգարանների մասնաճյուղերը կարծես որբի կարգավիճակում լինեն, ֆինանսապես անկախ չեն, պետությունն էլ հազիվ կարողանում է գումար տրամադրել թանգարանին, որի մասն են կազմում մասնաճյուղերը: Մեզ մեր վաճառած տոմսերից էլ գումար չի մնում: Պետությունը պետք է տարբերակ մտածի` մասնաճյուղ թանգարաններին գոնե տարրական պայմաններով ապահովելու համար»,- Factor.am-ի հետ զրույցում նշում է Արա Սարգսյանի և Հակոբ Կոջոյանի տուն-թանգարանի տնօրեն, Արա Սարգսյանի թոռնուհի Աննա Սարգսյանը:

Նրա խոսքով` այս պայմաններում հնարավոր չէ անգամ խոսել արտաբյուջեի մասին.

«Ունենք հրաշալի ժառանգություն, որն անտեսված է. դա ցավ է պատճառում, փորձում ենք մեր միջոցներով ինչ-ինչ խնդիրներ լուծել, երբեմն՝ գտնել հովանավորներ: Ստեղծել ենք թանգարանին կից հիմնադրամ, սակայն դեռևս չենք կարողանում գումար հավաքել մեր հոգսերը հոգալու համար: Նախարարությունից երբեմն ասում են` վատ եք աշխատում: Իսկ ինչպե՞ս աշխատել, եթե տարրական հաստիքներով չեն ապահովում: Թանգարաններն այսօր ամենաշատն այցելուի կարիք ունեն, դրա համար հարկավոր է ճիշտ մենեջմենթ: Իսկ մեզ որտեղի՞ց մենեջերի, փիար գծով մասնագետի հաստիք»:

Աննա Սարգսյանը հիշեցնում է այլ երկրներում գործող մեկենասության մասին օրենքը, ըստ որի՝ գործարարները, ֆինանսավորելով արվեստի ոլորտը, հաճախ ազատվում են հարկերից.

«Արա Սարգսյանն ունի գիպսե քանդակներ, հայտնիների կիսանդրիներ, որոնք եթե բրոնզից չձուլվեն, կդառնան անպիտան, մենք պարզապես կկորցնենք այդ գործերը: Այս հարցում, օրինակ, մեկենասները կարող են օգնել»:

Աննա Սարգսյանը խոսում է մեկ այլ ՝ Գեղարվեստի ակադեմիան Արա Սարգսյանի անունով կոչելու հարցի շուրջ ևս.

«Հայտնի է, որ Արա Սարգսյանն է Երևանի գեղարվեստական ինստիտուտի հիմնադիրը, 15 տարի էլ եղել է այդ կառույցի ռեկտորը, սակայն երբ խոսվում է ակադեմիայի անվանակոչության մասին, ասում են, օրինակ` Այվազովսկու անունով դնենք: Այսինքն` մեզ համար ավելի ընդունելի է Այվազովսկին, որն ամբողջ կյանքում ապրել է Հայաստանից դուրս, քան «Նեմեսիս» գործողության մասնակից Արա Սարգսյանը, որը ժամանակին Վիեննայից եկավ Երևան` վտանգելով կյանքը և դնելով հայկական պրոֆեսիոնալ քանդակագործության սկիզբը»:

Մանրամասները` տեսանյութում:

Աննա Բաբաջանյան