Հասարակություն
26.10.2021 | 21:25Երեկ Արագածոտնի մարզի Կարբի համայնքում տեղի ունեցածը ցնցել է գյուղացիներին․ 11 և 19 տարեկան քույրերը, նախնական տվյալներով, մահացել են գազի արտահոսքի հետևանքով։
Դեպքը տեղի է ունեցել Կարբիի 3-րդ փողոցում գտնվող տանը։ Համագյուղացիները, հարազատները հավաքվել էին տան մոտ․ նկարահանել չթույլատրեցին, բայց կադրից դուրս որոշ մանրամասներ պատմեցին։
Ընտանիքի հայրն արտերկրում է, մայրը որդու հետ խնձորի բերքահավաքի է եղել, տուն է վերադարձել երեկոյան, ավագ դստեր նշանածի հետ և աղջիկներին հայտնաբերել խոհանոցում՝ անգիտակից վիճակում։
Երեկ սարսափելի ցուրտ էր, ասում էին հարևանները, երեխաները, ըստ երևույթին, տաքանալու նպատակով ինքնաշեն գազաբալոնային համակարգից են օգտվել, ինչն էլ թունավորման պատճառ է դարձել։ Աղջիկները խոհանոցում ճաշելիս են եղել, հարազատները չբացառեցին նաև սննդային թունավորման հնարավորությունը, սակայն ՀՀ Քննչական կոմիտեից տեղեկացնում են, որ հատուկ սարքի միջոցով տանն իրականացված ստուգման արդյունքում հաստատվել է, որ գազի արտահոսք կա։
Տունը գազիֆիկացված չէ, տան բակում տեղադրված է եղել ինքնաշեն գազաբալոնային համակարգ, որին միացված ռետինե խողովակով գազը տեղափոխվել է տան խոհանոց. այնտեղ գործել է գազային այրման ջրատաքացուցիչ և գազօջախ, իսկ ծխատար և օդատար ուղիներ ընդհանրապես առկա չեն եղել, նշված է Քննչական կոմիտեի տարածած հաղորդագրության մեջ։
11-ամյա աղջիկը Աշտարակի բժշկական կենտրոն է ընդունվել արդեն մահացած վիճակում, իսկ 19-ամյա քույրը, գիտակցության չգալով՝ կես ժամ անց հիվանդանոցում մահացել է։ Դեպքի հանգամանքները պարզելու համար նշանակվել են մի շարք փորձաքննություններ, այդ թվում՝ դիակի դատաբժշկական փորձաքննություն։ Դեպքի առթիվ նյութեր են նախապատրաստվում։
Մանրամասները՝ տեսանյութում։
Սաթենիկ Հայրապետյան
