10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
Խնդրահարույց են Աշխատանքային օրենսգրքի փոփոխությունները․ դրվագային լուծումներ են տալիս խնդիրներին, ո՛չ համակարգային․ իրավաբաններ․ ՏԵՍԱՆՅՈՒԹ
Հասարակություն
26.10.2021 | 17:02
ՀՀ Աշխատանքի և սոցիալական հարցերի նախարարությունը քննարկման է դրել «Աշխատանքային օրենսգրքում փոփոխություններ և լրացումներ կատարելու մասին» օրենքի նախագիծը։ Հելսինկյան քաղաքացիական ասամբլեայի Վանաձորի գրասենյակն ուսումնասիրել է առաջարկված նախագիծը՝ վեր հանելով մի շարք թերացումներ: Oրերս պաշտոնյաների հետ տեղի ունեցած հանդիպմանը ներկայացրել են առաջարկներ։
Ի թիվս այլ հարցերի՝ ՀՔԱՎ իրավաբաններ Սոֆյա Պետրոսյանը և Տիրուհի Վարդանյանը խնդրահարույց են համարում այն, որ առաջարկվող նախագծով սահմանվում է՝ աշխատող անձը կարող է դիմել դատարան, եթե համաձայն չէ աշխատանքային պայմանների փոփոխման, աշխատանքային հարաբերությունների դադարեցման, իր իրավունքների առերևույթ խախտման այլ դեպքերում։ Ըստ մասնագետների՝ նման դրույթի նախատեսմամբ սահմանափակվում է աշխատանքային իրավունքների լիարժեք պաշտպանության իրականացումը։ Առաջարկում են հավելումներ կատարել։
Հայաստանում աշխատողը կարող է ենթարկվել տարատեսակ հետապնդումների ղեկավարության կողմից։ Աշխատանքային օրենսգիրքը սահմանում է աշխատողի պատվի և արժանապատվության պաշտպանության պահանջներով հայցային վաղեմության պահանջ չտարածելու մասին դրույթ, մինչդեռ, ըստ ՀՔԱՎ մասնագետների, սահմանված չէ ամենից շատ տարածված հանցադեպերից մեկը, երբ սեռական հետապնդման միջոցով նսեմացվում է անձի արժանապատվությունը։
Հայաստանյան իրականության մեջ առավել հանդիպող խախտումներից մեկն այն է, երբ քաղաքացին աշխատում է սահմանված ժամից ավելի, սակայն հավելավճարներ չեն սահմանվում, տրվելու դեպքում էլ հասկանալի չի դառնում՝ արդյո՞ք արդարացի է այդչափ գումար տրամադրելը։ Իրավաբանները հարցազրույցում առաջարկում են կոնկրետացնել խախտումների դեմ սահմանված կարգավորումները։
Եվ մեկ կարևոր խնդիր՝ աշխատանքային պայմանագրի լուծման թեմայով․ հաստիքների կրճատման դեպքում աշխատանքային պայմանագիրը լուծելիս գործող օրենսգիրքն ընդարձակում է գործատուի կամքի ազատությունը՝ իր նախընտրած աշխատողի հետ աշխատանքային հարաբերությունները շարունակելու հարցում։ Մասնագետները, թեև որոշ վերապահումներ ունեն այս հարցում, այդուհանդերձ, նկատում են առաջընթաց։
Ամփոփելով․ ՀՔԱՎ իրավաբաններ Սոֆյա Պետրոսյանը և Տիրուհի Վարդանյանը, ընդհանուր առմամբ, խնդրահարույց են համարում Աշխատանքային օրենսգրքի փոփոխությունները՝ կարծիք հայտնելով, որ գործ ունենք դրվագային և ո՛չ համակարգային լուծումների հետ։
Հարցազրույցն ամբողջությամբ՝ տեսանյութում։
Ռոբերտ Անանյան
