«Գազպրոմ»-ում զանգվածային կրճատումներ են ծրագրում

«Գազպրոմ»-ի կառավարման խորհրդի նախագահի տեղակալ Ելենա Իլյուխինան խորհրդի նախագահ Ալեքսեյ Միլլերին առաջարկել է ընկերության կենտրոնական գրասենյակում և Սանկտ Պետերբուրգի մասնաճյուղում աշխատողների թիվը կրճատել ավելի քան մեկուկես անգամ՝ 4100-ից հասցնելով 2500 մարդու։ Այս մասին ասվում է դեկտեմբերի վերջին նրա ուղարկած և 47news տելեգրամ ալիքի կողմից հրապարակված փաստաթղթում, գրում է Meduza-ն։

Դիմելով Միլլերին՝ Իլյուխինան պարզաբանում է, որ վերջին 20 տարիների ընթացքում անձնակազմի թիվը մի քանի անգամ ավելացել է, իսկ աշխատավարձի ֆոնդը կազմում է տարեկան 50 միլիարդ ռուբլի, և այժմ օպտիմալացում է անհրաժեշտ «կառավարման և արտադրական գործընթացների բոլոր մակարդակներում», ինչը թույլ կտա, ի թիվս այլ բաների, միջոցներ ազատել՝ աշխատակիցների մոտիվացիան և զարգացումը բարձրացնելու համար: Նա նաև նշել է, որ «խմբի առջև ծառացած մարտահրավերները» պահանջում են որոշումների ընդունման ժամանակի կրճատում, կրկնօրինակ գործառույթների վերացում և առանցքային գործընթացների իրականացման մեջ ներգրավված աշխատակիցների՝ արդյունքների վրա ուշադրության մեծացում։

Առաջարկվում է մինչև փետրվարի 15-ն աշխատակիցների կողմից իրականացվող գործառույթների աուդիտ անցկացնել և կոնկրետ լուծումներ ներկայացնել։

47news-ը նշում է, որ «Գազպրոմի» կենտրոնական գրասենյակն ամբողջությամբ համալրված է, և այնտեղ թափուր աշխատատեղեր չկան։ Թափուր աշխատատեղեր կան ընկերության արտադրամասերում, սակայն այն ղեկավարները, որոնք կրճատման տակ կընկնեն, դժվար թե «տիրապետում են անհրաժեշտ աշխատանքային որակավորումներին»։

Նամակի իսկությունն ու ակտուալությունը Forbes-ին հաստատել է «Գազպրոմի» կառավարման խորհրդի փոխնախագահ և տեղեկատվական քաղաքականության բաժնի ղեկավար Սերգեյ Կուպրիյանովը։ Նա, սակայն, հրաժարվել է այլ մեկնաբանություններից։

Թարգմանությունը՝ Էմմա Չոբանյանի