19.11.2024 | 14:40
Ավինյանը հայտարարեց. պատրաստ է բանավիճել Հայկ Մարությանի հետ ցանկացած ֆորմատով, ժամի ու վայրում․ ՏԵՍԱՆՅՈՒԹ
ՀՀԿ-ի բարքերը ՔՊ-ի օրո՞ք. Factor TV-ի տեսախցիկին հարվածողը Արմավիրի մարզպետի հորեղբայրն է․ ՏԵՍԱՆՅՈւԹ
Քաղաքականություն
18.10.2021 | 23:23
Հոկտեմբերի 17-ին Գյումրիում կայացած ՏԻՄ ընտրությունների ժամանակ Factor TV-ն ահազանգ էր ստացել 31/76 ընտրատեղամասի մոտակայքում մարդկանց և ավտոմեքենաների կուտակումների մասին: Ընտրատեղամասը տեղակայված է Գյումրու Նորավան թաղամասում գտնվող թիվ 18 դպրոցում: Ահազանգի հետքերով գնալուց հետո տարածքում արձանագրեցինք խմբված անձանց:
Ընտրատեղամասի մոտ հավաքված քաղաքացիները խուսափում էին տեսանկարահանվել, ինչպես նաև պատասխանել հարցին, թե ինչ նպատակով են գտնվում ընտրատեղմասի մոտ: Ներկաներից մեկը, մեր հարցերին ի պատասխան, հարվածեց Factor TV-ի տեսախցիկին, ապա պահանջեց, որ իրեն չնկարահանենք:
Հետագայում պարզեցինք և «Քաղաքացիական պայմանագիր» կուսակցության Գյումրու նախընտրական շտաբում էլ չհերքեցին, որ այս քաղաքացին Արմավիրի ՔՊ-ական մարզպետ, 30-ամյա Համբարձում Մաթևոսյանի հորեղբայրն է և Գյումրու ավագանու ՔՊ-ի ընտրացուցակի 13-րդ համարի թեկնածու Աղասի Մաթևոսյանի հորեղբոր որդին: Ի դեպ, ինքը՝ Աղասի Մաթևոսյանը նույնպես քվեարկության ընթացքում ընտրատեղամասի տարածքում էր, շփվում էր քաղաքացիների հետ:
Իրավապաշտպան Ժաննա Ալեքսանյանն անընդունելի է համարում ՔՊ-ական մարզպետի և ավագանու անդամի թեկնածուի ազգականի դրսևորած վարքը: Իրավապաշտպանի խոսքով՝ սա կենտրոնական իշխանությունների՝ լրագրողների նկատմամբ ցուցաբերած պահվածքի և կայացրած որոշումների հետևանքն է:
Ժաննա Ալեքսանյանն արձանագրում է՝ այն, ինչ իրեն թույլ է տվել ՔՊ-ական Համբարձում Մաթևոսյանի հորեղբայրը, չի համապատասխանում Նիկոլ Փաշինյանի՝ Հայաստանին տրված «ժողովրդավարության բաստիոն» բնորոշմանը:
Factor TV-ի նկարահանող խմբի մասնագիտական գործունեության խոչընդոտումն արձանագրել է նաև դիտորդական առաքելություն իրականացնող «Անկախ դիտորդ» դաշինքը: Կազմակերպության ներկայացուցիչ Դանիել Իոաննիսյանը խիստ դատապարտելի է համարում ընտրությունների ընթացքում լրագրողների մասնագիտական գործունեության խոչընդոտումը:
Համբարձում Մաթևոսյանի և Գյումրու ավագանու ՔՊ-ական թեկնածու Աղասի Մաթևոսյանի ազգականի՝ Արամ Մաթևոսյանի պահվածքը իշխող ուժի կողմից քննադատության չարժանացավ: Խնդրին չանդրադարձավ նաև Գյումրու քաղաքապետի ՔՊ-ական թեկնածու Հովհաննես Հարությունյանի նախընտրական շտաբը՝ չնայած այն հանգամանքին, որ ցուցակում նաև լրագրողներ կան: Իսկ ահա ՔՊ-ի Գյումրու կառույցի ղեկավար Կարեն Սարուխանյանը երեկ հետևյալ կերպ արձագանքեց. «Եթե նման միջադեպ է եղել, եթե այնտեղ իրավիճակ կա, որ պետք է իրավապահները զբաղվեն, ապա գնահատական կտրվի»:
Համաբարձում Մաթևոսյանը հորեղբոր՝ Արամ Մաթևոսյանի պահվածքի վերաբերյալ նշեց, որ վերջինս տեսախցիկին չի հարվածել:
Հետաքրքիր է նաև, որ Համբարձում Մաթևոսյանը պնդում է, թե մենք խոչընդոտել ենք իր ազգականի ազատ տեղաշարժը: Թե ինչպես ենք խոչընդոտել Արամ Մաթևոսյանի տեղաշարժը՝ տեսանյութն ամբողջությամբ չդիտած ՔՊ-ական մարզպետը չի հիմնավորում, սակայն կադրերից միանգամայն պարզ է, որ Արամ Մաթևոսյանն ազատորեն քայլում է իր նախընտրած ուղղությամբ:
Հիշեցնենք, որ նախորդ իշխանություններին մերժելու ցանկությունը քաղաքացիների մոտ առաջացել էր նաև տասնամյակներ շարունակվող այսօրինակ դեպքերի հետևանքով, երբ իշխող կուսակցության ներկայացուցչի մերձավորին կարելի է այն ամենը, ինչ չի կարելի շարքային քաղաքացիներին:
Մանրամասները՝ տեսանյութում։
Նարեկ Կիրակոսյան
