22.01.2026 | 17:20
Ալիևը Դավոսում Թրամփի հետ քննարկել է TRIPP նախագիծը, Հայաստանի հետ հարաբերությունների կարգավորումը
Արցախում տնտեսական ակտիվության ցուցանիշը աճել է 17.5 տոկոսով
23.03.2018 | 17:16
Արցախում տնտեսական ակտիվության ցուցանիշը 2018թ. հունվար-փետրվարին նախորդ տարվա նույն ժամանակահատվածի համեմատ աճել է 17.5 տոկոսով. տեղեկացնում է ԱՎԾ-ն:
Նշված ժամանակաշրջանում տնտեսական ակտիվության ցուցանիշի աճին հիմնականում նպաստել է արդյունաբերական արտադրանքի, գյուղատնտեսության համախառն արտադրանքի և շինարարության ծավալների աճը:
Այսպես, ընթացիկ տարվա հունվարին արդյունաբերական արտադրանքի ծավալն աճել է 84.1 տոկոսով, գյուղատնտեսության համախառն արտադրանքի ծավալը՝ 39.2 տոկոսով, իսկ շինարարության ծավալների աճը կազմել է 23.5 տոկոս: Բացարձակ արտահայտությամբ արդյունաբերության համախառն արտադրանքի ծավալը կազմել է 10 միլիարդ 814 միլիոն դրամ, գյուղատնտեսության համախառն արտադրանքի ծավալը՝ 1 միլիարդ 831 միլիոն դրամ, իսկ շինարարության ծավալները՝ 1 միլիարդ 130 միլիոն դրամ:
Ակնհայտ է, որ ընթացիկ տարվա տնտեսական ակտիվության աճի տեմպերի արագացումը Արցախում որոշիչ կլինի նաև տնտեսական աճի ընդհանուր ցուցանիշի հարցում, ինչը թույլ կտա խոսել երկրի տնտեսական զարգացման լուրջ հեռանկարների մասին:
Նշենք, որ Արցախում Ազգային վիճակագրական ծառայությունը (ԱՎԾ-ն) 2015թ.-ից ամսական կտրվածքով ներկայացնում է տնտեսական ակտիվության ցուցանիշը (ՏԱՑ-ը): Այն ընդգրկում է տնտեսական գործունեության բոլոր տեսակները և յուրաքանչյուր ամսվա համար իրենից ներկայացնում է ամբողջ տնտեսության կտրվածքով մեկ ագրեգացված ցուցանիշ` ինդեքսի տեսքով: Երկրի տնտեսական առողջությունը չափող այս ցուցանիշը, ի տարբերություն Ազգային հաշիվների մեթոդաբանությամբ հաշվարկվող ՀՆԱ ցուցանիշի, բնութագրում է ոչ թե ավելացված արժեքի, այլ տնտեսությունում ապրանքների և ծառայությունների թողարկման ծավալների փոփոխությունը` հանդիսանալով ավելի օպերատիվ, ընդունելի ու ներդրումների տեսանկյունից առավել գրավիչ ցուցանիշ: Այն օգտագործվում է երկրի տնտեսական ծրագրերը կազմելու, տնտեսական հաջողությունները գնահատելու, տնտեսության բոլոր ճյուղերում տնտեսական զարգացումները կանխատեսելու համար: Չի ընդգրկում արտադրանքի զուտ հարկերը և ֆինանսական միջնորդության անուղղակիորեն չափվող ծառայությունները, որոնք ներառված են եռամսյակային ու տարեկան ՀՆԱ-ի արտադրական եղանակով հաշվարկներում` դրանով իսկ հստակ պատկերացում տալով տնտեսության իրական վիճակի մասին:
