Ինչպես կառավարությանն աշխատանքի ուժ հաղորդեց մեկ բանկա թարմ կոյուղաջուրը․ Զարուհու էֆեկտը. ՏԵՍԱՆՅՈՒԹ

Հայաստանում կենցաղային ոչ մեծ հարցերն անգամ առանց սկանդալի չեն լուծվում: Կառավարությունը մարտի 22-ի նիստում գումար հատկացրեց Արդարադատության նախարարության քրեակատարողական վարչությանը՝ «Նուբարաշեն» քրեակատարողական հիմնարկի արտաքին և ներքին ջրահեռացման ցանցերի վերակառուցման նպատակով: Հարցը չզեկուցվող էր, 39 միլիոն 618 հազար 700 դրամը հատկացվեց առանց աղմուկի և անհապաղ՝ պահուստային ֆոնդի հաշվին:

Վերջին 10 տարիներին կառավարության կողմից պահպանման միջոցներ չտրամադրելու պատճառով քրեակատարողական հիմնարկներում կոյուղագծերի վերանորոգման աշխատանքներ չեն իրականացվել: Կառավարությունը նշում է, որ «Նուբարաշեն» քրեակատարողական հիմնարկի արտաքին և ներքին ջրահեռացման ցանցերը գտնվում են անմխիթար վիճակում: Կոյուղաջրերի հոսքից, երկար տարիներ ընթացիկ նորոգման աշխատանքներ չիրականացվելու հետևանքով առաջացել են բազում խ նդիրներ` հողի քայքայում, վթարված հանգույցներ, բազմաթիվ նստվածքներ և այլն, ստեղծվել է հակասանիտարական վիճակ ոչ միայն քրեակատարողական հիմնարկում, այլ նաև հարակից, մասնավորապես՝ բազմաբնակարան շենքերին շրջապատող տարածքում: Եվ, համաձայն կառավարության, այժմ նորոգում են՝ քանի դեռ հակասանիտարական վիճակը համաճարակային չի դարձել:

Բայց ինչո՞ւ գարշահոտ խնդիրը, որը 10 տարի չի լուծվել, հանկարծ կարգավորվեց: Նուբարաշենի բնակիչները հաճախ են բողոքել գարշահոտությունից, լրատվամիջոցները բազմիցս լուսաբանել են խնդիրը, բայց քանի դեռ դրանք սովորական բողոքներ էին՝ առանց հաշվեհարդարի սպառնալիքների, կառավարությունն աչքաթող էր անում, ինչի մեծ փորձ է կուտակել տարիներ ի վեր:

Նուբարաշենի բնակիչները 2017 թվականի հունիսի 28-ին փակել էին ճանապարհը՝ նույն՝ վերանորոգման պահանջով։ Վերջին անգամ էլ իրենց բողոքի ձայնը բարձրացրեցին 2018թ. փետրվարի 12-ին։ Ավագանու՝ փետրվարի 13-ի նիստում «Երկիր Ծիրանին» այդ կոյուղաջրից մի բաժին հատկացրեց Երևանի քաղաքապետին. Զարուհի Փոստանջյանի խմբակցության քայլը որակվեց որպես ահաբեկչություն և կասեցվեց տղամարդկային բռունցքների գործադրմամբ: Ու թեև շատերը դատապարտում էին «Երկիր Ծիրանիի» քայլը, սակայն նուբարաշենցիները հայտարարեցին, որ դա ավագանու խմբակցությունն արել է իրենց խնդրանքով: Արդյունքում՝ Արդարադատության նախարարությունը կոսմետիկ վերանորոգում սկսեց անմիջապես:

Նուբարաշենցիների պարագայում տեղին է «Կարկուտը ծեծած տեղն է ծեծում» ասացվածքը. առանց այն էլ նրանք աղբավայրի գարշահոտն են շնչում. ի դեպ, այս խնդրի լուծման համար էլ բավականին մեծ վարկ է Հայաստանը ստացել, սակայն աղբավայրը մնում է իր տեղում և գնալով մեծանում է: Բայց սա այլ խնդիր է: Կառավարությունն ինքը փաստում է, որ Նուբարաշենի՝ քրեակատարողական հիմնարկին մոտ հատվածում ապրելն արդեն վտանգավոր է կյանքի և առողջության համար՝ դրանով արձանագրելով, որ խախտել է մարդկանց՝ առողջ և անվտանգ ապրելու իրավունքը: Հիմա գործադիրը որոշել է կոյուղագծերը հիմնովին նորոգել:

«Երկիր Ծիրանի»-ի քայլի արդյունքո՞ւմ էր ըստ պատկան կառույցների՝ վաղուցվա մշակված ծրագրի շուտափույթ իրականացումը, թե ոչ՝ դժվար է միանշանակ պնդել։ Սակայն փաստն այն է, որ մինչև չեղավ համապետական սկանդալ, խնդիրն այդպես էլ չլուծվեց։

Հիշենք, թե ինչպես 2017թ. սեպտեմբերի 14-ին էլ Աշտարակի Վարդգես Պետրոսանի անվան դպրոցի ոսուցչական անձնակազմը գործադուլ արեց և կառավարությունից կորզեց վթարային վիճակում գտնվող դպրոցի շենքի վերանորոգման խոստում: Այս անգամ էլ հարցը լուծվեց ուղիղ եթերով Երևանի ավագանու անդամների խայտառակվելուց հետո: Հաջո՞րդը որն է:

Սևակ Հակոբյան