Քաղաքականություն
27.09.2021 | 12:40Ռուսաստանն ու Թուրքիան այսօր ուզում են մեկուսացնել Հարավային Կովկասը։ Եվ դա պաշտոնապես ձևակերպել են «3+3» ձևաչափով։ Այս մասին այսօր հրավիրված քննարկման ժամանակ ասաց Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը։
«Փորձ է արվում նեղ շրջանակներով լուծել միջազգային հարցերը, մինչդեռ Հայաստանը ԵԱՀԿ-ի անդամ է, Հարավային Կովկասի երկրները ԵԱՀԿ-ի անդամ են։ Ուրեմն, Հայաստանը կպայքարի, որ ԵԱՀԿ շրջանակներում անվտանգային հարցերը լուծվեն։ Մենք պետք է այդպես առաջ շարժվենք, դժվար է, Հայաստանի կառավարության վրա շատ լուրջ ճնշում կա առաջին հերթին Ռուսաստանի կողմից։ Բայց հենց դրա համար էլ կոչվում ենք անկախ պետություն, որ դիմենք ՄԱԿ-ի անվտանգության խորհուրդ, ԵԱՀԿ և այնտեղ աշխատենք»,- նշեց Ստեփան Գրիգորյանը։
Նրա խոսքով՝ Հայաստանը ԵԱՀԿ-ի անդամ է, ԵԱՀԿ շրջանակներում կան սահմանազատման հարցերով հայտնի ռեկոմենդացիաները, որը լուրջ փաստաթուղթ է, և սահմանազատման հարցում Հայաստանը պետք է առաջնորդվի միջազգային նորմերով։
«Շատ ողջունելի է, որ Հայաստանի կառավարությունը դեմ չէ դելիմիտացիային, բայց այստեղ կան նրբություններ՝ ո՞ր քարտեզներով պետք է իրականացվի դա։ Եթե Հայաստանը դիմի միջազգային արբիտրաժային դատարան կամ ՄԱԿ-ի անվտանգության խորհրդի միջոցով այդ հարցը բարձրացնի, պարզ է՝ հարցը կլուծվի 1923-26 թվականի քարտեզներով: Այդ դեպքում պարզվելու է, որ «Լաչինի միջանցք» հասկացություն չկա, դա Լեռնային Ղարաբաղի մեջ է, ուրեմն ոչ մի պրոբլեմ չկա, որ մեզ շանտաժ են անում, թե Լաչինի միջանցքը կփակեն։ Շատ ու շատ իբր վիճելի տեղեր ստեղծված են Սովետական Միության ժամանակ՝ Ստալինի, Բերիայի ժամանակ։ Ոչ մի Գորիս-Կապան ճանապարհի խնդիր չկա, միջազգային նորմերի համաձայն՝ ամբողջ ճանապարհը Հայաստանի տարածքում է։ Դրա համար էլ մյուս կողմն ասում է՝ չէ, 1976 թվականի քարտեզներով…»,- նշեց Գրիգորյանը։
Քաղաքագետի դիտարկմամբ՝ Ադրբեջանը տարածաշրջան է բերում նոր խաղացողների, օրինակ՝ Պակիստանին; «Մենք էլ ասում ենք՝ ավելի լավ չէ՞ աշխատենք ԵՄ-ի, ԱՄՆ-ի հետ, կան երկրներ, համակարգեր, որոնք ուզում են, որ այս տարածաշրջանում խաղաղություն լինի… Շատ լավ է, որ Հայաստանը պատրաստ է երկխոսել Ադրբեջանի և Թուրքիայի հետ»,- նշեց Գրիգորյանը:
Մանրամասները՝ տեսանյութում:
