Տնտեսություն
20.03.2018 | 17:36
ՀՀ ազգային վիճակագրական ծառայությունը հրապարակել է այս տարվա հունվար-փետրվար ամիսների սոցիալ-տնտեսական վիճակը բնութագրող նախնական տվյալները, ըստ որոնց, տնտեսական ակտիվության ցուցանիշը, նախորդ տարվա նույն ժամանակահատվածի համեմատ, աճել է 8,6 տոկոսով։
Չնայած, պաշտոնական վիճակագիրները տնտեսական ակտիվության ցուցանիշը ներկայացնում են իբրև տնտեսական աճը բնութագրող տվյալ, սակայն իրականում այն որպես այդպիսին չի հանդիսանում։ Հենց դա է պատճառը, որ վերջին տասը տարիներին Հայաստանի տնտեսությունը շարունակական անկում է ապրում, ընկերությունները մեկը մյուսի ետևից սնանկանում են, տարեկան արտագաղթում է բնակչության 1,5-2 տոկոսը, բայց միևնույն է, պաշտոնական վիճակագիրները ազդարարում են տնտեսական ակտիվության ցուցանիշի աճի մասին։
Արտաքին առևտրի մասով, պաշտոնական վիճակագրությունը հունվար-փետրվարի կտրվածքով արձանագրել է 43,2 տոկոսի աճ։ Մասնավորապես, նշված ժամանակահատվածում Հայաստանից արտահանվել է 386,9 մլն դոլարի ապրանք, ներկրվել՝ 711,5 մլն դոլարի։ Անցած տարվա նույն ցուցանիշի համեմատ արտահանումը և ներմուծումը աճել են համապատասխանաբար 41 և 44,4 տոկոսով։ Արդյունաբերական արտադրանքի ծավալը այս տարվա առաջին երկու ամիսներին աճել է 8,3 տոկոսով, գյուղատնտեսության համախառն արտադրանքի ծավալը նվազել է 0,1 տոկոսով, շինարարության ծավալները ավելացել են 22,7 տոկոսով, իսկ առևտրի շրջանառության աճը կազմել է 17,4 տոկոս։
Մի խոսքով, թվերով աճում ենք ու աճում։ Այն փաստը, որ նախկինում պաշտոնական վիճակագիրները տնտեսական ակտիվության ցուցանիշի 3,5-ից 4 տոկոսի աճ էին ներկայացնում, իսկ այժմ՝ կրկնակի ավել, ունի շատ բարզ բացատրություն։ Վերջին տարիներին տնտեսությունն այնքան է անկում ապրել, որ ցանկացած տեղաշարժ կարող է ներկայացվել իբրև կտրուկ աճ։ Մասնավոր ներդրողները կարող են Հայաստանից հեռանալ, օտարերկրյա ներդրումները կարող են ընդհանրապես չգալ, բայց ՀՀ կառավարությունը կարող է պետական պարտքը ավելացնելով որևէ ծրագիր նախաձեռնել, օրինակ՝ ճանապարհաշինարարություն, ու այդ եղանակով վիճակագրական աճ մատուցել։ Դրանից, սակայն, Հայաստանի տնտեսության վիճակը չի փոխվում։
Վահագն Հովակիմյան
