Քաբուլի օդանավակայանում խուճապ է սկսվել

Աֆղանստանի մայրաքաղաք Քաբուլի օդանավակայանում խուճապ է սկսվել այն բանից հետո, երբ մարդկանց կոչ են արել հեռանալ օդանավակայանից՝ ԻՊ-ի հարձակման սպառնալիքի պատճառով, գրում է Al Jazeera-ն։

Միացյալ Նահանգներն ու դաշնակիցները կոչ են արել մարդկանց հեռանալ Քաբուլի օդանավակայանից՝ «Իսլամական պետություն» (ԻՊ) ահաբեկչական խմբավորման հարձակման սպառնալիքի պատճառով, քանի որ արևմտյան զորքերը շտապում են հնարավորինս շատ մարդկանց տարհանել մինչև օգոստոսի 31-ը:

Թալիբների՝ Քաբուլ ներխուժումից ի վեր, 11 օրերի ընթացքում, ԱՄՆ-ը և նրա դաշնակիցներն իրականացրել են պատմության մեջ ամենամեծ օդային տարհանումներից մեկը՝ դուրս բերելով ավելի քան 88․000 մարդու: Ամերիկյան բանակը հայտնում է, որ ինքնաթիռներն օդ են բարձրանում յուրաքանչյուր 39 րոպեն մեկ:

«Թալիբան» շարժման գրոհայինները հսկում են օդանավակայանի սահմանը, որտեղ հավաքված հազարավոր մարդիկ փորձում են փախչել «Թալիբան»-ի կողմից կառավարվող Աֆղանստանից: Քաբուլից «Ալ Ջազիրա»-ի լրագրողը հայտնել է, որ ԱՄՆ շուրջ 1500 քաղաքացի, որոնց պետք է տարհանել, մնացել են Աֆղանստանի մայրաքաղաքում:

«ԱՄՆ-ը և «Թալիբան»-ը հստակ պայմանավորվածություն ունեն։ Թալիբներին կարգադրված է ոչ մեկին առանց անձնագրի, առանց կանաչ անցաթղթի կամ ստուգված փաստաթղթի չթողնել։ Մարդկանց շրջանում շփոթություն է առաջացել, թե ինչ տեսք ունի, այսպես կոչված, ստուգված փաստաթուղթը»,- հայտնել է լրագրողը։

Նա նաև նշել է, որ Քանդահարի օդանավակայանը վերաբացվել է՝ հույս հայտնելով, որ միջազգային թռիչքները հնարավոր կլինեն, եթե նույնիսկ Քաբուլի օդանավակայանը փակվի կամ դրա աշխատանքում խափանումներ լինեն:

Միևնույն ժամանակ, երկրում աճում է հումանիտար ճգնաժամը։ Պարենի համաշխարհային ծրագիրը հայտնել է, որ մոտ 39 միլիոնանոց երկրում շուրջ 14 միլիոն մարդու սով է սպառնում:

Տաթև Ֆռանգյան