ԵՐԵՎԱՆԻ ԺԱՄԱՆԱԿՈՎ. Անհատն իր փոքրիկ շրջապատի վրա պետք է ազդի, որպեսզի ատելության խոսք չտարածվի. Գևորգ Տեր-Գաբրիելյան. ՏԵՍԱՆՅՈՒԹ

«Աշխարհում ծաղկում է դավադրապաշտությունը, Հայաստանում վիճակն ավելի բարդ է պատերազմի պատճառով: Պատճառահետևանքային կապերի վերլուծումը, նպատակաբանությունը, համակարգային մտածողությունը օգտագործվում են դավադրապաշտությունը զարգացնելու համար»,- նման տեսակետ է հայտնում արձակագիր, Եվրասիա համագործակցություն հիմնադրամի տնօրեն Գևորգ Տեր-Գաբրիելյանը Factor TV-ի հետ զրույցում:

Նա անդրադառնում է նաև մեր հանրության շրջանում ատելության խոսքի տարածմանը` նկատելով, որ մարդիկ, ինչպես ամբողջ աշխարհում, մեզ մոտ ևս չունեն վարքականոններ համացանցում. «Ամենաթողությունը չի զսպվելու, օրինակ, դպրոցում. այս հարցում որոշիչ է լինելու միայն անհատական, ընտանեկան դաստիարակությունը: Անհատը պետք է իր փոքրիկ շրջապատի վրա ազդի, որպեսզի ատելության խոսք չտարածվի: Ոչ մի հանրային ինստիտուտ այլևս չի կարողանալու զսպել ատելության խոսքը: Մարդկանց զգայունությունը «իշխի» անարդար ազդեցության նկատմամբ սարսափելի կերպով մեծացել է»:

Հանրային համերաշխության մթնոլորտի ձևավորման հարցում մեր զրուցակիցը կարևորում է կրթության դերը: Նրա համոզմամբ` կրթական գործընթացներում այսօր միաժամանակ ունենք և´ դրական միտումներ, և´ խոշոր թերացումներ. «Այսօր Հայաստանում ոչ ֆորմալ կրթությունը հսկայական քայլերով զարգացում է ապրում նաև շնորհիվ միջազգային աջակցության: Ռեֆորմը, որ տեղի է ունենում մեր կրթական համակարգում, առաջընթաց է, այն առաջարկում է ուսուցում` հիմնված կոմպետենցիաների վրա: Ֆորմալ կրթությունն այլևս ի զորու չէ կատարել այն, ինչ իրենից ուզում ենք, պետք է գա ոչ ֆորմալ կրթությունը, ձևավորվի քննադատական մտածողությամբ քաղաքացի, որը կունենա ֆունկցիոնալ, ոչ հիերարխիկ պատկերացումներ»:

Ինչ վերաբերում է կրթության ոլորտի մասնագետներին, Գևորգ Տեր-Գաբրիելյանի կարծիքով, նրանք վատը չեն, պարզապես մեզ հարկավոր են, այսպես ասած, մասնագետների մասնագետներ:

Մանրամասները` տեսանյութում:

Աննա Բաբաջանյան