25.12.2025 | 23:38
Ճապոնիայում 5,6 մագնիտուդով երկրաշարժ է գրանցվել
«Իրենք զոռով մտել են Յոթ Վերք, ի՞նչ կարող ենք անել»․ Փաշինյանի այցի պատճառով Տեր Գառնիկն այլ եկեղեցում կպատարագի
Հասարակություն
05.12.2025 | 13:42
«Պետք է Յոթ Վերքում պատարագ մատուցեի, էլ չեմ մատուցելու։ Առաջնորդից հրաման ունեմ, որ պատարագը Սուրբ Ամենափրկիչում պետք է մատուցում։ Հրաման է, պետք է այդպես անեմ, ինձ թվում է՝ պարզ է։ Հավանաբար՝ վարչապետի այցով պայմանավորված»,- Factor.am-ի հետ զրույցում այս մասին ասաց ՀԱԵ Շիրակի թեմի քահանա տեր Գառնիկ Ավոյանը։
Հիշեցնենք՝ Նիկոլ Փաշինյանն այսօր առավոտյան հայտնել էր, որ կիրակի պատարագի է մասնակցելու Գյումրիի առաջնորդանիստ Սուրբ Աստվածածին (Յոթ Վերք) եկեղեցում։ Երեկ Փաշինյանը Factor TV-ի հարցին ի պատասխան՝ նշել էր, որ մասնակցում է այն պատարագներին, որտեղ Գարեգին Բ կաթողիկոսի անունը չի հիշատակվում։
Փաշինյանը նշել էր, որ կաթողիկոսի անունը զեղչելու հարցով քահանաների հետ հանդիպում են նաև ԱԱԾ ծառայողները։ Նման հանդիպում եղել է, օրինակ, Գյումրիի հոգևորականներից Տեր Ռուբեն քահանա Գասպարյանի հետ։ Տեր Գառնիկ քահանա Ավոյանը Factor TV-ին փոխանցեց, որ պատրաստ է պատարագ մատուցել, սակայն կաթողիկոսի անունը չի զեղչի։
«Եթե ես լինեի պատարագիչը, կաթողիկոսի անունը միանշանակ հիշատակելու էի։ Երևի իրենք չեն համաձայնվել, որ ես պատարագեմ։ Իրենք զոռով մտել են Յոթ Վերք, ի՞նչ կարող ենք անել։ Ո՛չ մեր թեմի քահանաներից է լինելու, ո՛չ սարկավագներից, ո՛չ դպիրներից»,- ասաց նա։
Նշենք, որ այս կիրակի Յոթ Վերք եկեղեցում Տեր Գառնիկ քահանա Ավոյանը պետք է առաջին պատարագը մատուցեր։ Այն տեղափոխվել է Գյումրիի Վարդանանց հրապարակի մյուս կողմում գտնվող Սուրբ Ամենափրկիչ եկեղեցի։
Նարեկ Կիրակոսյան
