Ալիևի ռեժիմի քննադատ ընդդիմադիր բլոգերին մահացած են գտել Թբիլիսիում․ հարազատները մեղադրում են Ադրբեջանի իշխանություններին

Ադրբեջանցի ընդդիմադիր բլոգեր Հուսեյն Բակիխանովին մահացած են գտել Թբիլիսիում հուլիսի 29-ի երեկոյան։ Այս մասին գրում է JamNew-ը։

Երիտասարդի մարմինը գտել են բնակարանում, որտեղ նա բնակվում էր։ Բլոգերի ընկերները նշում են, որ մահվան վարկածերից մեկի համաձայն՝ նա ընկել է շենքից։ Այս տեղեկությունը տարածել են բլոգերի ադրբեջանցի ընկերները, այդ թվում՝ լրագրող Աֆգան Մուխթարլին, որն իր ֆեյսբուքյան էջում գրել է, թե «ոստիկանությունը հաստատել է, որ Բակիխանովն ընկել է բարձրությունից»։

Հուսեյն Բակիխանովը քաղաքական միգրանտ էր Ադրբեջանից, որն ապրում էր Թբիլիսիում ու այնտեղ քաղաքական ապաստան էր փնտրում։ Մահից մի քանի օր առաջ՝ հուլիսի 12-ին, նրա հետ տարօրինակ միջադեպ է տեղի ունեցել, որի մասին վերջինս պատմել է YouTube-ում հրապարակված տեսանյութում։

«Ադրբեջանի կառավարության դավադրությո՞ւն, թե՞ պատահականություն» վերնագրով տեսանյութում Բակիխանովը պատմում է, որ իր վրա Թբիլիսիի կենտրոնում հարձակվել է 5 ադրբեջանցի, որոնց ինքը տեսել է դեպքից մի քանի օր առաջ։
«Նրանք հանկարծակի սկսեցին ինձ վիրավորել ու հարձակվեցին»,- պատմել է բլոգերը։

Տեսանյութը նա նկարահանել է շտապօգնության մեքենայում, որն ինքն է կանչել։ Բակիխանովը նաև նշել է, որ փախել է Ադրբեջանից և իրեն մի քանի օր է մնացել, որ Վրաստանում փախստականի կարգավիճակը հաստատող վկայական տրամադրեն։
Միջադեպն ու տեղեկատվությունը վրացական «Ֆորմուլա» հեռուստաալիքի հետ զրույցում հաստատել է բլոգերի ազգական Ավթանդիլ Մամեդովը, որին արդեն հարցաքննել են ոստիկանությունում։ Նա չի բացառում, որ Բակիխանովի մահը Ադրբեջանի կառավարության շահերից է բխում և հարձակվողները կարող էին ուղարկված լինել Ադրբեջանի իշխանությունների կողմից։
Մամեդովը հաստատել է, որ բլոգերը Վրաստանից քաղաքական ապաստան է խնդրել, քանի որ Ադրբեջանի կառավարության կողմից հետապնդումների է ենթարկվել և սեփական երկրում կալանքի տակ պահվել։

Միջադեպի մասին առաջիններից մեկը հայտնել է ադրբեջանցի լրագրող Աֆգան Մուխթարլին, որը բնակվում է Գերմանիայում։ Նա գրել է, որ Բախիխանովին հետապնդել է ադրբեջանական ոստիկանությունը։ Բացի այդ, նա հայտնել է, որ բլոգերը «հուլիսի 12-ին ծեծի է ենթարկվել, որից հետո մերժել են հետազոտել նրա ներքին օրգանները»։

Նշենք, որ Բակիխանովը ձերբակալվել էր 2021թ․ մայիսի 7-ին Բաքվում բողոքի ակցիայի ժամանակ։ Նրան 15 օրվա կալանքի են դատապարտել։ Ազատ արձակվելուց հետո նա լրագրողներին պատմել է, որ ոստիկանության կողմից խոշտանգումների ու սպառնալիքների է ենթարկվել։

«Թբիլիսիում գտնվելու ընթացքում նա անընդհատ քննադատում էր Ադրբեջանի կառավարությանը, ադրբեջանական լրատվամիջոցներին»,- ֆեյսբուքյան իր էջում գրել է Մուհթարլին։

Նշենք, որ Ադրբեջանի նախագահ Իլհամ Ալիևի ռեժիմի քննադատ ակտիվիստները, ընդդիմադիրներն ու բլոգերները պարբերաբար հետապնդումների և հարձակումների ենթարկվում ադրբեջանական իշխանությունների կողմից, այդ թվում՝ երկրից դուրս։ Մասնավորապես, մայիսին Ստամբուլում մահացած է գտնվել ադրբեջանցի երիտասարդ ակտիվիստ, նախկին քաղբանտարկյալ Բայրամ Մամեդովը, որը առավել հայտնի է Հեյդար Ալիևի արձանին քաղաքական կարգախոսներ գրելու դեպքով։ Նրա մահվան հանգամանքներ դեռ բացահայտված չեն։

Մի քանի ամիս առաջ էլ Ֆրանսիայում բնակվող ադրբեջանցի ընդդիմադիր բլոգեր ու քաղաքական միգրանտ Մուհամմեդ Միրզալիի նկատմամբ է մահափորձ իրականացվել․ մի խումբ տղամարդիկ հարձակվել են նրա վրա, դանակով հարվածներ հասցրել և փորձել կտրել նրա լեզուն։ Այս հարձակման մեջ իրավապաշտպանները մեղադրել են Ադրբեջանի իշխանություններին։

Էմմա Չոբանյան