Քաղաքականություն
30.07.2021 | 13:28ԱԺ արտահերթ նիստում այսօր քննարկվում է ՀՀ քրեական օրենսգրքում և քրեական դատավարության օրենսգրքում փոփոխությունների փաթեթն առաջին ընթերցմամբ ընդունելու հարցը: Խոսքն անձին հրապարակավ վիրավորելու և զրպարտելու արարքները քրեականացնելու մասին է:
ԱԺ պատգամավոր Սոֆյա Հովսեփյանը հետաքրքրվեց, թե ինչպես են գնահատվելու հանրության կողմից իշխանությանը տրվող այսպիսի գնահատականները՝ «անհայրենիք», «հողատու», «կապիտուլյանտ» և այլն:
«Կամ ինչպե՞ս պետք գնահատվի, օրինակ, տիկին Լենա Նազարյանի ասած՝ «իդիոտկա» արտահայտությունը։ Եթե նման բառերը չենք կարողանալու տանել այս օրենքի դաշտ, ապա ոչինչ չի լինելու։ Գոնե գրեիք, որ սեռական բնույթի հայհոյանքի մասին է խոսքը»,- ասաց Հովսեփյանը:
ՀՀ արդարադատության նախարարի տեղակալի պաշտոնակատար Քրիստինե Գրիգորյանը պատասխանեց. «Վստահ եմ, դուք էլ եք տարբերակում, թե որոնք են քննադատությունը, հայհոյանքը, անձի արժանապատվությունը անպարկեշտ ձևով ոտնահարելը: Առավելագույնս փորձել ենք ձևակերպել հստակ, որպեսզի իրավակիրառ պրակտիկան շտանի այլ տեղ:
Սոֆյա Հովսեփյանը պնդեց, որ այս օրենքը խնդիրներ է առաջացնելու քաղաքական գործիչների համար, հիմք է դառնալու հետապնդումների համար. «Կա՛մ կլինեն սուբյեկտիվ մոտեցումներ, կա՛մ օրենքը չի գործելու»։
Քրիստինե Գրիգորյանն արձագանքեց. «Ձեր ասած բառերը դժվար է վերագրել հայհոյանքին… Այս նախագիծը միջանկյալ «հրդեհ մարելու» փորձ է»։
Մանրամասները՝ տեսանյութում:
