ԱԺ արտահերթ նիստը՝ ՈՒՂԻՂ

Ժամը 12։00-ին մեկնարկել է ԱԺ արտահերթ նիստը․ սա 7-րդ գումարման Ազգային ժողովի վերջին նիստն է։  Արտահերթ նիստի օրակարգում 6 հարց է ընդգրկված։  Նախագծերից մեկով առաջարկվում է լրացում կատարել Քրեական օրենսգրքում։ Ըստ այդմ՝ նախատեսվում է քրեականացնել անձին հրապարակավ  վիրավորելը և զրպարտելը։ Նախագծում ասվում է՝ «Անձին ծանր վիրավորանք հասցնելը՝ հայհոյելը կամ նրա արժանապատվությունն այլ ծայրահեղ անպարկեշտ եղանակով վիրավորելը, պատժվում է տուգանքով` նվազագույն աշխատավարձի 100-ապատիկից 500-ապատիկի չափով», եթե դա կատարվել է տեղեկատվական կամ հաղորդակցական տեխնոլոգիաներն օգտագործելով, «կատարվել է անձի հանրային գործունեությամբ պայմանավորված, պատժվում է տուգանքով` նվազագույն աշխատավարձի 500-ապատիկից 1000-ապատիկի չափով»: Եթե դա պարբերական բնույթ է կրում, «պատժվում է տուգանքով` 1000-ապատիկից 3000-ապատիկի չափով կամ կալանքով՝ 1-3 ամիս ժամկետով»: Իսկ հանրային գործունեություն է համարվում անձի կողմից լրագրողական, հրապարակախոսական գործունեության, ծառայողական պարտականությունների կատարման, հանրային ծառայության կամ հանրային պաշտոն զբաղեցնելու, հասարակական կամ քաղաքական գործունեության հետ կապված վարքագիծը: Նախագծի հեղինակներն են Վլադիմիր Վարդանյանը, Աննա Կարապետյանը, Հովհաննես Հովհաննիսյանը, Արփինե Դավոյանը, Գևորգ Պապոյանը, Վահագն Հովակիմյանը, Նարեկ Զեյնալյանը, Լուսինե Բադալյանը, Կորյուն Մկրտչյանը և Անդրանիկ Քոչարյանը։ Նախատեսվում են փոփոխություններ նաև «Պետական սահմանի մասին», Հողային օրենսգրքում, «Կրթության մասին» օրենքներում։

Մերի Մարտիրոսյան