Թուրքիայի փափուկ ուժը դրեց ռիսկային ռազմական ձեռքբերումների հիմքը․ ամերիկացի փորձագետ

Թուրքիայի կողմից փափուկ ուժի օգտագործումը՝ ներառյալ դիվանագիտության, առևտրի, ընկած են ռիսկային, ռազմական ու աշխարհառազմավարական ձեռքբերումների հիմքում։ Այս մասին ասել է ԱՄՆ բանակի պաշտոնաթող գնդապետ ու ռազմաքաղաքական փորձագետ Ռիչ Օութզենը, գրում է «Ահվալ» գործակալությունը։

Թուրքիայի ռազմական ներխուժումները սիրիական Իդլիբ և Լեռնային Ղարաբացի հարակից տարածքներ, ըստ Օութզենի, ցույց են տալիս, որ որոշ ռիսկերի արժի գնալ։

«Մենք տեսնում ենք դիվանագիտական համագործակցության օրինակ, դիվանագիտական համագործակցությունը ծնում է կոմերցիոն ակտիվություն, կոմերցիոն ակտիվությունը՝ ռազմական համագործակցություն, իսկ ռազմական համագործակցությունը տանում է փոխանակումների, որոշ դեպքերում՝ ռազմական և արդյունաբերական համագործակցության»,- ասել ամերիկացի փորձագետը՝ հավելելով․ «Եվ շուտով արդյունքը կլինի, կունենաք ցանց, որն իր մեջ ներառում է վայրեր Բալկաններում, Կովկասում, Հյուսիսային Աֆրիկայում, ինչպես նաև Կենտրոնական Ասիայում»։

Փորձագետը նշում է, որ Թուրքիան վերջին տարիներին եռապատկել է իր դիվանագիտական ներկայացուցչություններն Աֆրիկայում և ավելի քան 6 անգամ ավելացրել մայրցամաքի հետ ապրանքաշրջանառության ծավալը։ Թուրքիան նաև հեղափոխություն է արել իր ռազմական տեխնոլոգիական ոլորտում՝ արտադրելով նոր անօդաչու թռչող սարքեր, արբանյակներ, ռադիոէլեկտրոնային պայքարի միջոցներ։ Օութզենն ասել է, որ ավանդական արտաքին քաղաքականությունը հանրապետական ժամանակահատվածում ավելի զգուշավոր էր ու պրագմատիկ՝ ի հակադրության սրա։

«Նույնիսկ սառը պատերազմից հետո մենք տեսանք, որ Թուրքիան շատ զգուշավոր էր, նրանք հետևում էին «զրո խնդիր՝ հարևանների հետ» քաղաքականությանը, որը փորձում էր լուծել խնդիրները Սիրիայում, Իրանի հետ, Ռուսաստանի հետ, բայց գտավ, որ տարածաշրջանը այրվում է կրակի մեջ»,- ասել է ամերիկացի փորձագետը։

Նա նշել է, որ 2020 թվականին էլ Թուրքիան ցույց տվեց իր ուժը բազմաթիվ ճակատներում, ինչպիսիք են Սիրիան, Լիբիան և Լեռնային Ղարաբաղը։

«Երեք տարբեր թատրոն՝ ուժի ցուցադրման երեք տարբեր դրամատիկ կիրառումներով, 4-րդն էլ PKK-ի դեմ ամբողջ տարվա ընթացքում պայքարն է, Սիրիայում՝ ավելի փոքր, Իրաքում՝ ավելի մեծ ծավալով։ Սա չի համապասխանում թույլ կամ մեկուսացած Թուրքիայի գաղափարին»,- ասել է է ԱՄՆ բանակի պաշտոնաթող գնդապետը։

Էմմա Չոբանյան