22.11.2024 | 21:37
ՀՀ ԶՈՒ հավաքականը թիմային աղյուսակում հունահռոմեական ոճում զբաղեցրել է 3-րդ հորիզոնականը. ըմբշամարտի զինվորականների ԱԱ
«Հայաստան» համահայկական հիմնադրամի միջոցներով Գյումրիում կառուցվում է 2 բնակելի շենք և մանկապարտեզ. ՏԵՍԱՆՅՈՒԹ
Տնտեսություն
28.07.2021 | 15:54
Գյումրու Մուշ թաղամասում «Հայաստան» համահայկական հիմնադրամի հավաքագրած գումարներով այս պահին կառուցվում են երկու բնակելի շենքեր՝ 36 բնակարանով և 50 տեղանոց մանկապարտեզ։ Բնակարանները սոցիալական են, կտրամադրվեն երկրաշարժից անօթևան մնացածների հերթացուցակում գրանցվածներին, որոնք բնակվում են տնակներում, նրանց առաջիկա 5 տարում, գուցեև 10 տարում սեփականության վկայականներ չեն տրամադրվի։ Ծրագիրը, որը կոչվում է «Մեր Գյումրին», նպատակ ունի օգնել Գյումրիին տնակներից ազատելուն։
Այս մասին այսօր լրագրողների հետ զրույցում տեղեկացրեց շինհրապարակ այցելած «Հայաստան» համահայկական հիմնադրամի տնօրեն Հայկակ Արշամյանը։ Նա Շիրակի մարզպետ Հովհաննես Հարությունյանի ու Գյումրու քաղաքապետ Սամվել Բալասանյանի ուղեկցությամբ եկել էր անձամբ ծանոթանալու շինաշխատանքների որակին ու ընթացքին։
Հայկակ Արշամյանը նշեց, որ շինարարությունը կավարտվի այս տարվա վերջին կամ մյուս տարվա սկզբին։
Վերջինիս հաղորդմամբ, ծրագրի ընդհանուր արժեքը 2 միլիոն դոլար է, շենքերը կառուցվում են համայն հայության հավաքագրած գումարներով։ Մանկապարտեզի շենքն էլ կառուցվում է Ֆրանսիայի «Հայաստան» հիմնադրամի ֆինանսավորմամբ։ Շենքերը կունենան անվանումներ, մանկապարտեզը կկրի «Ֆրանսիա» անունը։
Նվիրատվությանը մասնակցել են նաև ՀՀ նախագահի աշխատակազմը, ինչպես նաև Հայաստանի մի քանի խոշոր գործարարներ։ Շենքերը, ըստ Հայկակ Արշամյանի, սնուցվելու են արևային էներգիայով, ինչը կկրճատի սոցիալապես անապահով բնակիչների ծախսերը։ Ներքևի հարկերում կտեղադրվեն արտադրամասեր՝ կարի արհեստանոց կամ վարսավիրանոց, որպեսզի բնակիչները հնարավորություն ունենան աշխատել։
Առաջին հարկը, ըստ Հայկակ Արշամյանի, կտրվի վարձակալությամբ, որի գումարը ևս կուղղվի շենքերի պահպանությանը։ Իսկ վերևի, այսպես ասած, հավելյալ հարկերը կտրամադրվեն արվեստագետներին՝ արվեստանոցներ հիմնելու ու ստեղծագործելու համար, որպեսզի շենքում բնակվող երեխաները մեծանան յուրահատուկ միջավայրում։
«Հայաստան» համահայկական հիմնադրամը բացի այս երկու շենքերից կկառուցի ևս երկու շենք։ «Մի լավ լուր ունեմ, ծրագիր ունենք ևս երկու շենք հենց այստեղ կառուցելու։ Շենքերի բնակարանների մի մասը կտրվի վերջին պատերազմում հաշմանդամություն ստացած մեր զինծառայողներին, որոնք ունեն կարգավիճակ, այսինքն՝ անօթևան են, սոցիալապես անապահով են, բազմանդամ ընտանիք ունեն։ Եվ եթե կարողանանք մի քիչ բարձր հարկայնություն ապահովել , հնարավոր է 60 բնակարան ստանանք այդտեղ, որից 25-ը կհանձնենք վերջին պատերազմի մասնակիցներին, որն այսօր մեր պարտքերից մեկն է, որը պիտի կատարենք», -ասաց Հայկակ Արշամյանը։
Արմիկ Մովսիսյան
