Քաղաքականություն
27.07.2021 | 15:24
ԱՄՆ Պետքարտուղարությունը ճանապարհորդելու համար հարմար երկրների վերաբերյալ հերթական խորհրդատվությունն է հրապարակել։ Պետդեպն ԱՄՆ քաղաքացիներին խորհուրդ է տալիս վերանայել Հայաստան ճանապարհորդելու ծրագրերը՝ COVID-19-ի պատճառով, քանի որ մի շարք վայրերում վարակի նոր դեպքերի ավելացման վտանգ կա։ Այս մասին տեղեկանում ենք Պետքարտուղարության պաշտոնական կայքից։
Նշվում է, որ Հիվանդությունների վերահսկման և կանխարգելման կենտրոնը COVID-19-ի բարձր մակարդակի պատճառով Հայաստանի համար 3-րդ մակարդակ է սահմանել։
Բացի այդ, խորհուրդ է տրվում չճամփորդել Լեռնային Ղարաբաղ՝ հակամարտության պատճառով։
«Պարբերական կրակոցները և հրետանային համակարգերի օգտագործումը, ներառյալ՝ ցամաքային ականներն ու ականանետերը, ամեն տարի հանգեցնում են մահվան դեպքերի ու վիրավորների: Խուսափե՛ք շփման գծի մոտակայքում գտնվող ճանապարհներից, ինչպես նաև Հայաստանի և Ադրբեջանի միջև միջազգային սահմանի մոտակայքում գտնվող ճանապարհներից։ ԱՄՆ կառավարությունը չի կարող արտակարգ ծառայություններ մատուցել Լեռնային Ղարաբաղում գտնվող ԱՄՆ քաղաքացիներին, քանի որ ԱՄՆ կառավարության աշխատակիցները սահմանափակված են այնտեղ ճանապարհորդել»,- ասվում է Պետքարտուղարության հաղորդագրության մեջ։
Էմմա Չոբանյան
