«Ես կդառնամ ձեր ազատության զոհը»․ Մակրոնը մեկնաբանել է բողոքի ցույցերը

Ֆրանսիայի նախագահ Էմանուել Մակրոնը մեկնաբանել է երկրում կորոնավիրուսի տարածումը կանխելուն ուղղված քայլերի դեմ լայնածավալ ցույցերը՝ ազգին միասնության կոչ անելով, և ընդգծել է, որ առանց պարտավորությունների ազատություն չկա, գրում է ria.ru-ն։

Հիշեցնենք, որ հուլիսի 17-24-ը երկրում համատարած բողոքի ցույցեր էին սանիտարական անցագրի գործածության ընդլայնման դեմ, համաձայն որի՝ բժշկական ոլորտի աշխատողները պարտավորվում էին ունենալ պատվաստման փաստաթուղթ, թեստի բացասական պատասխան կամ տարած հիվանդության ապացույց։ Բողոքող քաղաքացիներն այդ փոփոխություններն անվանել էին «սանիտարական դիկտատուրա»։

«Ոչ մի ազատություն չի կարող գոյություն ունենալ առանց պարտավորությունների։ Ազատություն՝ ես ոչ մեկի ոչինչ պարտական չեմ, գոյություն չունի: Իմ ազատությունն ավարտվում է այնտեղ, որտեղ սկսվում է ուրիշինը։ Այն հիմնված է փոխադարձ պարտականությունների վրա։

Ես հարգում եմ ձեր կասկածները, և կարծում եմ որ դրանց կարելի է համբերությամբ պատասխանել։ Բայց կան մարդիկ, որոնք այս ցույցերի ժամանակ ոչ բանական են գործում։

․․․Ես կշարունակեմ իմ աշխատանքը հանգիստ՝ հարգելով ուրիշներին։ Մեր համերկրացիները հիմա պետք է միավորվեն, որպեսզի հնարավորինս շատ մարդ պատվաստվի։ Եթե դուք չեք ցանկանում պատվաստվել, վաղը կարող եք վարակել ձեր հորը, մորը կամ ինձ։ Ուրեմն, ես կդառնամ ձեր ազատության զոհը, քանի դեռ դուք հնարավորություն ունեիք պաշտպանել ձեզ և ինձ։ Դա ազատություն չէ, դա կոչվում է անպատասխանատվություն և եսասիրություն»,- իր ելույթում հայտարարել է Մակրոնը։