«Արամ Խաչատրյան» համերգասրահում վերջին հրաժեշտը տվեցին Ջիվան Գասպարյանին

Այսօր՝ հուլիսի 24-ին, «Արամ Խաչատրյան» համերգասրահում վերջին հրաժեշտը տվեցին մեծանուն արվեստագետ, ՀԽՍՀ ժողովրդական արտիստ, դուդուկահար Ջիվան Գասպարյանին։

«Հայ ժողովուրդը մեծ կորուստ ունեցավ, կորցրինք դուդուկի մեծ վարպետի։ Մենք՝ դուդուկահարներս, վարպետից շատ բան ենք սովորել, վարպետը երաժշտության մեջ ուներ իր ուրույն ձեռագիրը։ Նա մեզ համար մեծ ճանապարհ կառուցեց, դուդուկը համաշխարհային ճանաչման բերեց, հուզված եմ որպես երաժիշտ ու հայ։ Ցավակցում եմ վարպետի ընտանիքին ու համբերություն մաղթում»,- լրագրողների հետ զրույցում ասաց դուդուկահար Կամո Սեյրանյանը։

ՀՀ ժողովրդական արտիստ Աշոտ Ղազարյանն էլ նշեց, որ Գասպարյանն իր երաժշտությամբ աշխարհին պատմել է ամեն ինչ․ «Իսկապես, մեծ կորուստ է, լեգենդ բառը շատ հասարակ ու սովորական է դարձել, բայց առաջին լեգենդներից մեկը հենց ինքն էր։ Մեծ լեգենդի կորցրինք, նվագով պատմել է ազգի պատմությունը ու ապացուցել, որ իսկապես արժանի ու հզոր ազգ ենք։ Կան բաներ, որ խոսքով չես կարող ասել, լռությունն ամեն ինչ ասում է։ Աստված հոգին լուսավորի»։

Հիշեցնենք, որ աշխարհահռչակ դուդուկահարը վախճանվել է հուլիսի 6-ին՝ 92 տարեկանում։

Ջիվան Գասպարյանը Խորհրդային Հայաստանի ժողովրդական արտիստ էր, Հայաստանի և Կանադայի երաժշտական ակադեմիաների անդամ։ Թողարկել է ավելի քան երկու տասնյակ ձայնասկավառակ, նվագել է բյուրավոր բեմերում, մասնակցել համաշխարհային ճանաչում վայելող ֆիլմերի երաժշտության ստեղծմանը: Արժանացել է միջազգային հեղինակավոր մրցանակների, այդ թվում՝ «Ոսկե գլոբուսի», պարգևատրվել է «Մեսրոպ Մաշտոց» մեդալով, «Հայրենիքին մատուցած ծառայությունների համար» առաջին աստիճանի շքանշանով և Հայաստանի Հանրապետության այլ պետական ու գերատեսչական պարգևներով, արժանացել է Երևանի պատվավոր քաղաքացու կոչմանը:

Դուդուկահարը մասնակցել է Եվա Ռիվասի Apricot Stone երգի բեմականացմանը՝ դառնալով «Եվրատեսիլ»-ի բեմում հայտնված ամենատարեց երաժիշտը: Ջիվան Գասպարյանի դուդուկը հնչել է աշխարհին հայտնի մի շարք ֆիլմերում՝ «Քրիստոսի չարչարանքները», «Գլադիատոր», «Սիրանա», «Արյունոտ ադամանդ», «Ձյուն և մոխիր» և այլն:

Գասպարյանի աճյունը կամփոփվի Կոմիտասի անվան պանթեոնում։

Հիշեցնենք, որ օրեր առաջ էլ անվանի դուդուկահարին վերջին հրաժեշտն էին տվել Լոս Անջելեսում։

Արփի Հակոբյան