07.03.2026 | 22:11
Նոր նշանակումներ՝ մարմնամարզության Հայաստանի հավաքականներում
Թալիբանը կրկին հայտարարել է, որ թույլ չեն տա թուրքական ուժերին մնալ Աֆղանստանում
Քաղաքականություն
23.07.2021 | 18:35
Թալիբան շարժման խոսնակը հայտարարել է, որ շարունակում են դեմ լինել Աֆղանստանում թուրքական ցանկացած ռազմական ներկայությանը, գրում է Ահվալ գործակալությունը։
Թուրքիան ցանկանում է ապահովել Քաբուլի Համիդ Քարզայի անվան միջազգային օդանավակայանի անվտանգությունը, այն բանից հետո, երբ ՆԱՏՕ-ի ուժերը դուրս գան Աֆղանստանից։ Սակայն Թուրքիայի այս առաջարկին դեմ է Թալիբանը, որը հիմա հավակնում է երկրում իշխանության։
«Սպուտնիկի» թուրքական ծառայության հետ զրույցում էլ Թալիբանի մամուլի խոսնակ Զաբիհուլլահ Մուջահիդը կրկին մերժել է Թուրքիայի առաջարկը։
«Մենք արդեն մերժել ենք Թուրքիայի դիրքորոշումը։ Մենք թույլ չենք տա, որ այլ օտարերկրյա ուժ մնա այս երկրում ցանկացած պատճառով ԱՄՆ-ի հեռանալուց հետո»,- ասել է նա։
Թալիբանի խոսնակը ողջունել է Թուրքիայի դերը Աֆղանստանում, սակայն միայն դիվանագիտական մակարդակով։
«Եթե Անկարան բանակցային գործընթացում նպաստի առաջընթացին ու կարողանա բարելավել իրավիճակը Աֆղանստանում, մենք ուրախ կլինենք։ Բայց մենք թույլ չենք տա Թուրքիային մնալ Աղֆանստանում»,- ասել է Մուջահիդը։
Ներկայում Աֆղանստանում ՆԱՏՕ-ի առաքելության անվան տակ շուրջ 500 թուրք զինծառայող կա՝ Համիդ Քարզայի անվան միջազգային օդանավակայանի պաշտպանության ու աֆղանական անվտանգության ուժերին մարզելու համար։
Էմմա Չոբանյան
